Россилэннуналэз
12-тӥ инвожое Россилэсь нуналзэ пусъё. Со 1990-тӥ арын РСФСР-лэн суверенитетэз сярысь Декларация кутэмен герӟаськемын. Собере одӥг ар ортчыса, 1991-тӥ арын 12-тӥ инвожое, РСФСР-лы (СССР-ысь республикалы) нырысетӥзэ президент бырйизы. 1994-тӥ арын сое Россилэн кун суверенитет сярысь деклараци кутэм нуналэныз ялӥзы. Нош 2001-тӥ арын со Россилэн нуналэзлы пӧрмиз.
Россилэн нуналэзлы сӥзьыса Башкортостанын пӧртэм ужрадъёс ортчыло: сабантуйёс, вал вылын ворттылонъёс но мукет. Со сяна, 12-тӥ инвожое Уфаын Городлэсь нуналзэ пусъё.
Кужмо регионъёс – кужмо шаер
Россия кужмо регионъёсыныз. Соос пӧлысь котькудӥз шаермылэн азинсконаз бадӟым люкет пыртэ. Башкортостан со ласянь азьмынӥсьёс пӧлын луэ. Татын ӟеч азинско топливной промышленность, химия но нефтехимия, электроэнергетика, металлургия, машиностроение но мукетыз. Республикамы, кылсярысь, Россия Федерациын улон юртъёсты ӝутонын витетӥ интыын луэ, гурт удысын поттэм лыдпусъёсъя, промышленной производстволэн быдӟалаезъя – сизьыметӥ, инвестициосъя но ӝутӥськонъя - 12-тӥ. Таӵе лыдпусъёсты сётэ БР-ысь Экономикаез азинтонъя министерство.
«Башкортостан Республикалэн политика но экономика ласянь ӟечлыкез, пӧртэм удысъёсын поттэм узырлыкез регионъёсын но кунъёсын ӟеч кусыпъёс тупатыны юрттэ», - вера БР-лэн Тӧроез Рустэм Хамитов.
Культура но спорт
Башкортостан Россиысь субъектъёс пӧлын музейёслэн лыдзыя нырысетӥ интыын луэ. Республикаямы 100 музейёс лыдъясько. Соос инкуазен, историен, калык культураен тодмато.
Башкортостанын трос пӧртэм турниръёс но спорт ӵошатсконъёс ортчыло. Кылсярысь, гужем биатлонъя дунне чемпионат, егитъёс пӧлын хоккея дунне чемпионат, калыккуспо нылпи шудонъёс. Со сяна, республикамы Россиысь трековой мотоспортлэн шоркареныз лыдъяське. Уфаын арлы быдэ йӧ вылын мотоциклъёсын ворттылонъя дунне чемпионатлэн этапъёсыз ортчыло.
Туннэ республикаямы, Россиын но дунне вылын тодмо спортсменъёс луо биатлонист Максим Чудов, шашкиен шудӥсь Тамара Тансыккужина, мотогонщик Николай Красников, паралимпиецъёс Оксана Савченко, Ирек Зарипов но мукетъёс.
2020-тӥ арын Россиын нырысьсэ Фольклориада ортчоз. Быдэс дуннеысь куноосты асьмелэн шоркармылы пумитаны оскемын. Россиысь Калык творчествоя юртэн кивалтӥсьлэн Тамара Пуртовалэн кылъёсызъя, Уфа таӵе бадӟым ужрадлы туннэ ик дась ни.
Дасяз
Ольга НИГАМАТУЛЛИНА.
Оставить сообщение: