- Ренат Биктимирович, улондэс выльысь берыктыны луысал ке, Тӥ удмуртъёслэн НКЦ-енызы кивалтон борды басьтӥськысалды-а?
- Басьтӥськысал.
- Уд жаляське-а таӵе секыт ныпъетэз ас вылады ӝутэмды пумысен?
- Выль ужез кутскыны котьку секыт. Мон пичи дырысеным секытлыкъёсты вормыны дышетски. НКЦ-ен кивалтон борды басьтӥськыку но аслам кужымелы осконэ бадӟым вал. Нош аслыд ачид оскид ке, мукетъёс но тыныд оско. Зэм, трос секытлыкъёс пыр потоно луи. Озьы ке но ас азям пуктэм ужпумъёсты котьку быдэстыны тырши. Пӧртэм калыкен пумиськылоно, пӧртэм ӧсъёсы йыгаськоно луиз. Озьы ке но туннэ вераны быгатӥсько: номыр сярысь уг жаляськы. Удмурт калыкеным данъяськисько, удмурт луэмме ноку ӧй ваты, котьку мон удмурт шуи, удмуртлыкмес ӝутон сярысь сюлмаськыса улӥ но ужай.
- Тӥлесьтыд уждэс азьланьтӥсь удмуртъёслы мар верасалды? Азьланяз кыӵеен адӟиськоды НКЦ-лэсь ужзэ?
- Туннэ пӧртэм ёросъёсысь удмуртъёслэн огазеяськыса улэмзы но ужамзы мон понна бадӟым шумпотон луэ. Оскисько, азьланяз но удмурт калыкмы ӟеч ужаны, сюлмысь шулдыръяськыны,ужъёсын басьтэм вормонъёсыныз данъяськыны быгатоз. Нош калыкен ужасьёслы одӥгзэ вераме потэ: сюлмысь мед ужалозы. Уж борды басьтӥськид бере, пумозяз вуттоно. Мукетъёслэсь возьмаса палэнын сылоно ӧвӧл. Уж понна аслэсьтыд кужымдэ но сётыны жаляно ӧвӧл. Мон ке ӧй лэсьты, кин лэсьтоз шуыса ужано. Ӟуч кылын сыӵе веран вань: мукетъёслы пиштыса ачим «ӝуасько». Калыкед понна, уж понна «ӝуаса» улоно. Соку гинэ бадӟымесь вормонъёс луо.
- Ренат Биктимирович, улон сюресады пумиськем адямиос пӧлын кинъёс тужгес бадӟым пытьы кельтӥзы? Кинъёслы Тӥ тау кылъёстэс вераськоды?
- Нырысь ик дышетӥселы но Вылысь Татышлыысь школаосын кивалтэм З. Л. Лукмановлы. Собере Татышлы ёросысь компартилэн нырысетӥ секретарезлы Р. К. Мухаметдиновлы. Озьы ик тау кылъёсме верасал Дуванысь гурт хозяйствоя техникумысь дышетӥсьёсылы. Удмурт Элькунысь эшъёсылы, тужгес но В. К. Тубыловлы.
- Тӥ трос кужымдэс понӥды республикаын удмурт вӧсьёсты улӟытон понна. Нош асьтэос инмарлы оскиськоды-а?
- Бен, вӧсьёс табере улӟемын. Со понна мон туж шумпотӥсько. Нош инмарлы кызьы уд оскы? Оскисько. Адямилы оскон кулэ, ваньмы ук инмар улын ветлӥськом. Куддыр кылын валэктыны но уг луы, макем бадӟым кужымез инмарлэн. Сое шӧдоно гинэ луиське.
- Тӥ 19 ар ӵоже НКЦ-ен кивалтӥды. Али сюлмады пӧртэм мылкыдъёс бугыръясько, дыр. Ма Тӥледыз туннэ тужгес шумпоттэ но сюлэмшугъяськытэ?
- Шумпотӥсько, удмурт кылмы, сям-йылолъёсмы, удмурт калыклэн культураез калыкмы пӧлын утиське, возиське шуыса. Азьланяз но озьы ик мед луоз. Сюлэмшугъяськонъёс но тырмыт. Ваньзэ вераса ик уд быдты. Удмуртъёс пӧлын кужмо азьветлӥсьёс, егитъёс пӧлын удмурт калыкмы понна сюлмаськисьёс трос мед луозы.
- Бадӟым тау вераськемдылы.
Вераськиз
Ирина САМИГУЛОВА.
Оставить сообщение: