icon_gotop
18+
autorisation
Войти | Регистрация
Время в Татышле
05:22
Пятница, 29 Марта
Рекламный баннер 990x90px top

Борддоръёс но тунсыкозэ верало

09:49 17.11.2016

Ермекей ёросысь Купченей гуртын улӥсьёс но калык узырлыксэс утьыны тыршо. Озьы дышетӥсьёслэн, дышетскисьёслэн но гурт калыклэн сюлмаськеменызы, школалэн одӥгез висъетэз музейлы пӧрмиз. Сое кылдытон бордын трос ужаз историяя азьвыл дышетӥсь Нина Мокеева. Нош али солэсь кутскем ужзэ школаен кивалтӥсь Наталья Антонова азинтэ. 

Музей аръёс ӵоже пӧртэм экспонатъёсын узырмем. Табере та пичи висъетэ вамыштыса ортчемзэ тодад ваиськод, син азе пуксе сюлэмез бугыртӥсь азьвыл улон. Уго татын пичи ке но, ӵыжы-выжыосмылэсь улон-вылонзэс быдэсак возьматыны инты шедьтэмын. Музее кожем бере ик вашкала удмурт корка син азе йӧтэ. Со крестьян адямилэсь корка пушсэ, ужан но праздник дыръя нуллоно дӥськутъёссэ возьматэ. Нош тужгес тунсыкоез луэ ужан но улонын кутӥськись тӥрлыкъёс. Татысь куиськон но черсон станокъёс, кубоос, эгырен ӟырдатоно утюгъёс, сюй горшокъёс но трос мукет арбериос азьлоеныз герӟало но дунъянтэм узырлык луо. Соос будӥсь нылпиослы асьсэ калыксылэсь улэмзэс но ужамзэс возьмато.

Музейысь борддоръёс но трос тунсыкозэ верало. Соос гуртлэн но школалэн кылдэмез, сям-йылолъёс, лулчеберет, школаен но колхозэн кивалтӥсьёс, ужысь ветеранъёс сярысь мадё. Кылсярысь, Купченей гуртлэн кылдэмез сярысь тазьы гожтэмын: «Башкортостанлэн лымшор но шундыпуксён палаз Купченеево (Куктянай) гурт интыяськемын. Отын та дыре 513 удмуртъёс уло. Татчы соос Сибире нуись чугун сюресэз лэсьтон вакытэ вуиллям. Та шаере удмуртъёс туала Удмуртилэн лымшор ёросъёсысьтыз лыктӥллям. Со сярысь Пурга, Можга, Бигра, Пельга, Титыр, Кутыр воршуд-выжы нимъёс но верало. Буш музъемъёслы синмаськыса, та выжыосысь куд-ог семьяос азьвыл улэм интыоссэс аналтӥллям. Шаерысьтызы кошкемъёс Белебей карысь эксэйлэсь пичигес музъем басьтӥллям. Со музъемъёслы документэз «купчая» шуо вылэм. Отысь потэм Купченеево ним но».

Нош палэнынгес Быдӟым Атыкай оже кошкемъёс но вормонэн бертэм солдатъёс, Афганистанын, Чечняын луэм воин-интернационалистъёс сярысь верамын. Соослэн туспуктэмъёсынызы, нимтулъёсынызы котьку тодматскыны луэ.  

Музейын азьлоеныз валче туалаез но возьматэмын. Татчы школаын дышетскись пиналъёслэн устоесь киужъёссы интыяськиллям. Татын тросгес инты басьто школаез йылпумъям Валентина Мокеевалэн бирдыослэсь, кагазлэсь, курегпуз кӧмъёслэсь, пластилинлэсь быдэстэм паймымон ужъёсыз. 

- Школаын дышетскись пиналъёс музее котьку шумпотыса вамышто. Уго соос татысь маке но выльзэ адӟо-тодо, азьлоеныз тунсыкъясько, - вера музеен кивалтӥсь Наталья Николаевна. Озьыен, будӥсь пиналъёс азьланяз но калыкмылэсь узырлыкъёссэ утёзы но шаермес данъялозы.

Марина НИКОЛАЕВА.

Ермекей ёрос.       

6451

Оставить сообщение: