- Пичи трактор люкан – Андрейлэн малпанэз вал. Нырысь со бордын Андрей но Владислав вынъёсы тыршизы. Мон соку гурт хозяйствоын ужасько вал бере, соос котырын берганы дыры туж ӧз шедьы. Соослэн малпанзы но нырысь осконтэмгес потӥз. Нош берло валай: ужзы пӧрме. Собере мон но вынъёсылы юрттӥськыны басьтӥськи. Озьы уж дурамы асьмелэсь быгатонлыкмес кутыса но куд-огзэ интернетысь учкыса малпанмы быдэсмиз, - вера Руслан.
Вынъёслэн сюлэмзы трактор люканэн гинэ ӧз буйгатскы. Соин ужан тӥрлыкъёс – геры, турнан, мажес, лымы сузян но мукетсэ – лэсьтыны йӧндыризы. Асьсэ киосынызы люкам техникаоссы гурт улонын бадӟым юрттӥсьсы луо. Арлэн пӧртэм вакытаз соин кутӥсько.
Куинь агай-вынъёс пичиысен ик атайтэк кылизы, анайзы Надежда Николаевна пиоссэ таза, визьмо будэтыны тыршиз. Янаулысь газ службаын водительын ужась бадӟымез Руслан пиез семья кылдытыса, Шудеке выль корка ӝутӥз но отчы улыны выжизы. Вузкарисьын тыршись Регина кузпалыныз кык пиос будэто. Соослэн сизьыметӥ классэ ветлӥсь Максим пизы тракторен, пе, ветлэ ни.
- Руслан - ужась адями. Со дорысьтыз ужзэ быдтэ ке, кыкетӥ уж дураз лыктэ, - вера Шудек гурт поселенилэн администрацияз водительын тыршись Разиф агай. Руслан Янаулын ке но тырше, со вискын гуртысь культура юртын но ужаны вутске.
«Янаулводоканал» ООО-ын насосъёсты тупатъянъя машинистын тыршись Андрей Алёна кузпалыныз но Катя нылыныз Янаулын уло. Соос шутэтскон нуналъёсы гуртэ ӵемысь вуыло. Егит кузпалъёс Шудеке выль юрт ӝутон бордын ужало.
Надежда Николаевна уйпалан ужаса ветлӥсь Владислав пиеныз ӵош улэ. Нош шутэтскон нуналъёсы соос быдэс корка тыр огинэ люкасько. «Ог-огенызы соос эшъяськыса, тупаса уло. Ваньзы тыршисесь милям кулибинъёс», - вера Шудек гурт поселенилэн администрациеныз кивалтӥсь Инзиля Галихановна Минликаева.
Марина НИКОЛАЕВА.
Янаул ёрос.
Оставить сообщение: