Ужрад гуртысь 50 ар ӵошен улэм кузпалъёсты – Меншарифа но Сайфутдин Бадретдиновъёсты – ӟечкыланэн кутскиз. Администрациен кивалтӥсьлэн социальной ужпумъёсъя воштӥсез Николай Миншарапович Хаматдинов аслаз вераськоназ пусйиз:
- Ёрос бюджетэз эскероно ке, асьмелэн табышмы 25%-лы ӵоша. Бюджетлэн 60%-лэсь тросэз социальной ужпумъёсы кошке. Ёросмы гурт хозяйствоослы узыр. Огъя учконо ке, музъемлэн 15%-эз уже уг кутӥськы. Кузбай гурт поселениын пайдаяськымтэ музъемъёс ӧвӧл. Со туж умой. Азинскыны луонлыкъёс вань. Егитъёс гуртэ ик мед кылёзы шуыса, КФХ-ос, СПК-ос кылдытоно, со понна луонлыкъёс вань. Асьтэлы но ӧжыт вырӟылыны кулэ, иждивенческой амал – со югдурысь потон сюрес ӧвӧл. Кинлэсь ке курыса, ачид киостэ ал вылад тырыса пукод? Кун юрттэт басьтон сярысь сюлмаськоно. Сыӵеос понна ӧсъёс котьку усьтэмын.
Башкортостанлэн кылдэмезлы 100 ар тырмон улсын но пӧртэм ужъёс быдэстӥсько, модульной ФАП-ёс ӝутонлы но коньдон висъяське. Алтауысь ФАП со программае пыртэмын.
- «Реальные дела» программае, мылкыдды вань ке, шай котырез кенеранэз пыртыны луэ, - калыклы вазиськыса вераз Николай Миншарапович. – Гуртысь клубъёслэсь материально-технической базазэс умоятонлы но заявкаосъя коньдон висъяське.
Сюресъёсын, демографиен герӟаськем ужпумъёсты но Н. М. Хаматдинов ӝутӥз.
Кузбай гурт поселенилэн уженыз тодматӥз Кузбай гурт поселенилэн администрациеныз кивалтӥсь Р. М. Габдулхакова. Со сяна, собраниын вераськизы гурт поселенилэн Кенешезлэн депутатъёсыз А. Ф. Фаизова но Д. Б Ялалова.
Кылсярысь, А. Ф. Фаизова, фельдшер луэменыз, гуртысь демографической югдур сярысь вераз. Алтауын кулӥсьёслэн лыдзы тросгес, нуныос уг вордӥсько. Калык понна диспансеризация радъяське ке но, со гуртооссэ тазалыксылы бадӟымгес саклык висъяны куриз, тазалыко улонэн эшъяськыса улыны ӵектӥз. Озьы ик алтауослэсь сюлмаськонъёссэс, куронъёссэс шараяз.
Нырысь ик гурт калыкез сюлмаськытэ Кузбай но Алтау гуртъёс куспысь сюрес, кытӥ сӥзьылэн-тулысэн ортчыны ик уг луы. Со сюрес алтауослы гинэ кулэ ӧвӧл, отӥ бускель Ваныш, Тепляк гурт послениосы пырись гуртъёсын улӥсьёс но ветло. Янаулэ, Нефтекамске мынӥсьёслэн сюрессы озьы трослы вакчия угось. Бурай пыр мынӥд ке, котырес луэ. Кыкетӥез бадӟым ужпум – со Кузбай но Алтау куспысь выж. Со куашканы вуэмын. Та ужпум сярысь котькуд собраниын кылпум ӝутӥське ке но, туннэ нуналозь номыр ӧз воштӥськы на. Озьы ик гуртоосты сюлмаськыто толалтэ ульчаосты югдытон, ФАП-лэсь корказьзэ тупатон, шайез кенеран.
Гуртын уж луымтэлы сюлмаськонэз ӧвӧл шуыса пусйиз Д. Б. Ялалова. Со нылпи юртысь басьтэм пиналъёсты уте. Озьы ик Дуся Байхузиевна сюрес сярысь, сюрес дурысь лесополоса сярысь кылпум ӝутӥз. Палэнэ ӧз кельты юон вуэн герӟаськем бадӟым ужпумез но.
- Ваньзы ошмесэ вулы ветлыны уг быгато. Гуртын арлыдоос трос угось. 18-20 метръем гудӟемысь вуэз юыны уг луы, со зынмемын, 39-40 метръем кудӟем гудытыны но котькудӥзлэн луонлыкез ӧвӧл. Та югдурысь потон сюрес шедьтыны уз луы меда? - вазиськиз со собрание вуэмъёслы.
Таиз ар Экологилэн ареныз ялэмын. Соин со гуртоосызлы чылкытлыкез утён сярысь сюлмаськыны ӵектӥз. Жуг-жагъёсты кытчы вуэм отчы куяно ӧвӧл шуиз. Кыедзэс ӝуатӥсьёслы но куронэн вазиськиз: чылкыт омырен, пе, шокам потэ, миськем дӥськутэз но педлон тӧлатыны луонлыкмы ӧвӧл, ӵын зынэн сэрен. Инкуазь ваньбурез утялтон – со аслыд улыны ӟеч луонлыкъёс кылдытон.
Гурт хозяйствоя управлениысь валтӥсь агроном Р. М. Шагиахметов лесополосаен герӟаськем ужпумез азьланьтыса шуиз:
- Со понна нимысьтыз программа ужа. Та юанэн вазиськоно лесхозэн кивалтӥсьлы И. Р. Хасановлы. Та ужпум быдэстонтэм ӧвӧл.
Собере Р. М. Шагиахметов тулыс кизён ужъёс сярысь вераськиз:
- Шумпотымон, тӥ дорын азинлыко ужало «Победа» ООО, Файзрахмановлэн но Хамитьяновлэн КФХ-оссы. Ужаны мылкыд карисьёслы – котьку вож сюрес. Ужало пӧртэм программаос, соосын сэрен субсидиос сётӥсько. Кышкано ӧвӧл, вазиське, ми юрттомы. Уж ӧвӧл шуыса, гуртысь кошконо ӧвӧл, музъемын ужано. Татчы заводъёс, фабрикаос уд пукты угось. Нылпи юртын улӥсь пичиос сярысь сюлмаськоно. Со ласянь тӥ Ялаловъёслэсь адӟем карыса улыны быгатӥськоды. Ужаны мылкыд карисьлы кунмы юрттэт котьку возьматэ.
Озьы ик валтӥсь агроном «Кооперация» программаен тодматӥз. Кӧня ке хозяйствоос огазеяськыса, одӥг юридической лицо кылдыто, асьсэлы кивалтӥсь бырйыса, кун юрттэт (субсидия) басьтыны быгато. Озьы соослэн асьсэлэсь поттэм вузъёссэс вӧлмытыны паськытэсь луонлыкъёссы кылдо.
ДРСУ-ысь валтӥсь инженер И. Ф. Нуриевлэн кылъёсызъя, 2017-тӥ арын Кузбай но Алтау куспысь сюресэз, выжез тупатон планэ пыртэмын ӧвӧл, коньдон сюрес усьтанлы гинэ висъямын. Калыкез со оскытӥз, азьпалан та уж быдэстӥськоз шуыса.
Виктор МАРДАНОВ.
Бурай ёросысь Алтау гурт.
Оставить сообщение: