icon_gotop
18+
autorisation
Войти | Регистрация
Время в Татышле
16:02
Четверг, 28 Марта
Рекламный баннер 990x90px top

Бадӟым Чакара гурезь пичи гуртлы кужым сётэ

12:21 17.08.2017

«Чиндэре, Чиндэре…» 

Архив кагазъёсъя, Качак но Чиндэр удмурт гуртъёс 1722-1723-тӥ аръёсы ортчытэм Нырысетӥ калык ревизия документъёсын нырысетӥзэ возьматэмын. Отын Оса дорогаын Большой Кочак но Новой Кочак нимо удмурт гуртъёс пусъемын. Нырысетӥяз уло вылэм 54 удмурт пиосмуртъёс (лыдъямын пиосмуртъёс гинэ), кыкетӥяз - дас удмурт но сизьым пор пиосмуртъёс. Та документъёсъя, Качак кылдэм 17-тӥ даурлэн пумаз, нош отысь кӧчемъёс интыяськиллям Чиндэр гуртэ.

Гуртъёс кылдон сярысь мадёсъёс но удмуртъёслэн кытысь, ку татчы вуэмзы сярысь номыр уг верало: «Первой Атабай дуре пуксиллям. Собере отын ву ӧвӧл луэмен, татчы кӧчиллям» (гожтэмын Г. Ш. Гарайшиналэсь, 1912-тӥ арын вордскем, Качак);  «Нырысь Герей дуре корка пуктӥллям. Отчы кык мурт усьыса кулэм. Соин Чиндэр ты доры пуксиллям» (гожтэмын Ф. И. Ильбаевалэсь, 1914-тӥ арын вордскем, Чиндэр). 

Кылдэмез дырысен гурт ӝужам но паськытам. Туннэ солэн ньыль урамъёсаз 69 гидкуаосын 212 улӥсьёсыз лыдъясько. Чиндэрын лякыт сямо, ужез яратӥсь, шуг-секытлыкъёсты вормыны быгатӥсь калык улэ. Соос шумпотыса данъяськыны быгато гурт удысын лул-сюлэмзэс поныса тыршем Канафия Тимирзяноваен, Тимофей Тимирхановен, Гыдьыбей Тимиркаеваен, Маринка но Мензявар Байметоваосын, Шамсикамал Мухаметгалиеваен, Туктабей Мениеваен, Башкортостан Республикаысь сӥё-дано дышетӥсен Фёдор Кунакбаевен, Россия Федерациысь дано киномеханикен Дмитрий Хайдаршинэн, Удмурт Элькунысь сӥё-дано журналистэн, «Вордскем кыл» журналлэн валтӥсь редакторез луыса ужам Ильтимир Байметовен но трос мукетъёсын.

Калык гуртлэн бадӟым праздниказ но пыр-поч дасяськем, юрт котыръёссэс, урамъёссэс ӝикыт утялтэм. Доразы гажаса вуэм куноосты ческыт пӧрам-пыжиськемъёсын, тыл вылын пӧзьтэм пӧсь ӝукен, шыдэн ӟеч мылкыдзэс сётыса куноязы. Ужрадэз ортчытыны юрттэт возьматӥзы «Победа» ООО, ёрос администрациысь физической культурая, спортъя но туризмъя комитетлэн кивалтӥсез Вячеслав Кугубаев. Вераны кулэ, Вячеслав Имасевич 2015-тӥ арын ортчем регионъёс куспысь «Чакара» фестивалез ортчытонын но юрттӥз. Пусйытэк кельтыны уг луы интыысь Райса Давлееваез, Людмила Имаеваез но быдэс гурт калыклэсь юрттэтсэ.   

«Ӟечбуресь, гуртоос!»   

Люкаськем калыкез гуртлэн юбилееныз ӟечкыланы Калтасы ёрос администрациен кивалтӥсь Ю. М. Садыров, Бадӟым Качак гурт поселенилэн администрациеныз кивалтӥсь Г. Д. Хайдаршин, Калтасы ёрос газетлэн редакторез В. А. Акиев, БР-ысь удмуртъёслэн НКЦ-енызы кивалтӥсь, «Ошмес» газетлэн редакторез С. Г. Гарифуллин, БР-ысь удмуртъёслэн НКЦ-енызы кивалтӥсьлэн воштӥсез Ю. С. Саитов вуизы.

- Берлось аръёсы гуртъёслы сӥзем праздникъёс, «Ӟечбуресь, гуртоос!» пумиськонъёс, трос ортчо. Соос калыкез огазеяны, вордӥськем шаерез гажаны юртто, - вераз Юрий Мензарипович.

Со сяна, со ужрадэз дасясьёслы тау кылъёссэ вераз но азьпалан но чиндэръёслы огкылысь луыса ӵошен улыны сӥзиз.

Нош Геннадий Дмитриевич Чиндэр гурт калыкез ӟечкыласа, соослэсь ӵошен ужаны быгатэмзэс, улонысь секытлыкъёсты вормыны быгатэмзэс пусйиз. Салимьян Гарифуллинович удмурт кылмес, сям-йылолмес, выжымес утьыны куриз. Виталий Аксяевич чиндэръёслэсь лыдӟиськыны яратэмзэс пусйиз. Со сяна, со гуртысьтызы почтальонкаез Екатерина Камаловаез кузьымен пусйиз.

Пумиськонэ люкаськем калык сак кылзӥз дышетонысь ветеранэз Дмитрий Насыровез. Со Чиндэр гуртлэн Совето Союз вакытэ улэмез сярысь мадиз. «Секыт улӥз та вакытэ калык. Трос курадӟонъёс ваиз война. Таин сэрен сиён-юон налог кылдӥз. Калык трудоденьлы ужаз. Гуртэ одӥг воргорон но ӧз кыльы. Вань гурт ужез губырскем пересьёс, нылкышноос но нылпиос быдэсъязы. Фронтэ гуртысь 96 кузя кошкизы, соос пӧлысь 41-ез сӧсырмыса, кин китэк, кин пыдтэк бертӥзы. Чиндэр калык чидаз, секытлыкез вормиз, - шуиз со. - Качак гурт поселение куать гуртъёс пыро. Милям гуртамы гинэ 28 вылӥ но 26 средне-специальной тодон-валанэн адямиос уло. Азьпалан но Чиндэр гуртлэн нимыз карта вылысь медаз ышы».

Гурт узыр калыкеныз, чебер семьяосыныз. Туннэ праздникын 50, 40, 30 но 25 ар ӵоже ӵошен ог-огзэс яратыса улэм Тайфа но Дмитрий Насыров, Феткия но Фениль Арсланов, Любовь но Альберт Шакрисламов, Валентина но Аркадий Байметов, Любовь но Марат Тимирбаев, Людмила но Сидор Меньшатов, Светлана но Вадим Тимирханов, Ульяна но Геннадий Хайдаршин кузпалъёсты ӟечкылазы. Гуртысь мӧйыос но палэнэ ӧз кыле. Маринка Байметоваез, Татлыбей Бадамшинаез но Менсера Галиахметоваез синпель кузьымъёсын пусйизы. Озьы ик татысь тужгес пичиеныз улӥсен -  сизьым толэзьем Сабрина Тимиртдиноваен – тодматӥзы. Гуртын тужгес чебер, утялтэм юртъерлы конкурс ялэмын вал. Отын Назия но Армягин Зайнетдиновъёслэн юртсы устоен лыдъямын.

Шуд арганчи удмурт гур, мед чузъяськоз гуртмы тыр!

Удмурт калык ужаны сяна, шулдыръяськыны но быгатэ. Учкисьёс шуныт пумитазы ёросысьтызы Бадӟым Качакысь, Кургакысь, Вылысь Тыхтемысь, Янаул ёросысь Шудекысь, Бурай ёросысь Алтаевоысь, Татышлы ёросысь Калмиярысь вуэм коллективъёсты. Асьсэос но, чиндэръёс, гуртсэс, калыксэс, Герей шурзэс, Чакара гурезьзэс, возьёссэс но лудъёссэс данъяса жингрес кырӟанъёссэс куноослы жалятэк кузьмазы. Озьы ик люкаськем калык зол кичабонъёсын пумитаз Григорий, Марат но Марис Тимирбаев агай-вынъёсты. Соос кырӟанъёсынызы ужрадлы аспӧртэм шӧм пыӵатӥзы. Со сяна, Тимирбаевъёс празднике выжыосын узыр писпу дасяллям. Кырӟан-эктонъёсын валче, кылбуръёс но чузъяськизы. Дмитрий Насыров гуртэзлы сӥзем чуръёссэ кузьмаз.

Бер ӝытозь кыстӥськиз шулдыръяськон. Пиналъёс но, мӧйыос но ог-огзылэсь люкиськыны ӧз ӵыдэ. Вить ар ортчыса, соос гуртлэн 300 ар тырмоназ выльысь пумиськыны вераськизы.

Марина НИКОЛАЕВА. 

Калтасы ёрос.    

10294

Оставить сообщение: