архив номеров

АРХИВ НОМЕРОВ

ПОСЛЕДНИЕ КОММЕНТАРИИ

Каталог предприятий

    развернутьсвернуть

    ВОПРОС-ОТВЕТ

      Кузь сюрес, ваё сюрес

      2013.10.17 740 0
      Кузь сюрес, ваё сюрес

      Кематэк Башкортостанын бадӟым ӝутӥськон ужъёс радъяськозы. Шаерамы поездъёслы ветлон сюрес тупатыны чакламын. Со сюрес республикамес «Москва-Казань-Екатеринбург» ӝог ветлон (высокоскоростной) магистрален (ВСМ-2) герӟалоз. Шаермылэн шоркарысеныз Пермь шаерысь Чернушка городозь кыстӥськись сюреслэн кузьдалаез 200 иськемлы ӵошалоз. ВСМ-лэн рокадной «вайёсыз» кузя поездъёс часаз 200-450 иськем ортчозы. Выль проект улонэ пыӵаз ке, Уфаысен Казане 3 час куспын вуыны луоз, Москвае – 6 часкын, Челябинске – 2,5-3 часкын, Екатеринбурге – 3-3,5 часкын.

      БР-ысь Госкомтранс бадӟым ӝутӥськонэн герӟаськем ужпумъёсты, шуг-секытъёсты шараян муген, калык пӧлын вераськонъёс радъяз. Та выллем ужрадъёс тросаз ёросъёсын ортчылӥзы. Отын котькуд адямилэн мал­панэз, ӵектонъёсыз но мылкыданъёсыз пыр-поч эскериськизы. Тужгес бадӟым ӝутӥськонэн сэрен, шаерамы ыштонъёс но луозы. Сюрес нюлэсъёс пыр но кыстӥськоз. Интыен-интыен писпуос но «ышозы». Тужгес пужымъёсты, кызъёсты, ньылпуосты утён сярысь сюлмаськоно луоз, уго та писпуослэн лыдзы республикаямы арысь аре кулэсме. ВСМ-лэн буферной зона шуон макеез одно ик чакламын луыны кулэ: со 750 метрлы ӵоша. Соин ик поезд сюрес кузяын 100 метрлэсь матэ номыр луыны кулэ ӧвӧл.

      Со сяна, чугун сюреслы проект дасясьёс пӧйшуръёслэсь интыысь интые выжемзэс но лыдэ басьтоно луозы. Шаерамы вань сыӵе интыос, кытӥ араз сюрслэсь ятыр койыкъёс ортчо. Улон интыослэсь гидрологизэс но пыр-поч эскероно. Куддыр со выллем ӝутӥськонъёсын сэрен, бусыосын, лудъёсын нюр, сыръясь интыос кылдо но нюлэсъёсысь писпуос куасьмо.

      Калыклэн тазалыкезлы изъян лэсьтонтэм сярысь но одно ик сюлмаськоно. Ӝутӥськонэ сюй нуллӥсь машинаос гуртъёс, улон интыос пыр ветлоно луизы ке, адямиос тузон пӧлын улыны кутскозы. Соин самосвалъёслы нимысьтыз сюресъёс тупатытэк уз луы.

      ВСМ-лэн сюресэз ас-пӧртэм луоз: рельсаосты итылыса уз тыре. Озьыен, ортчись поездлэн куараез но­кинлы уз люкеты. Проектъя, сюрес дуре звукопоглощающей экранъёс интыялозы.

      Вераны кулэ, бадӟым уж трос воштӥськонъёсты кулэ каре. Соин уж борды басьтӥськытозь, эскеронъёс радъяно, проектэ трос воштӥськонъёс пыртоно на.

      ВСМ-2 ӝутонын нырысетӥ вамыш 2014-тӥ арын лэсьтэмын луоз. Проект бордын «Ленгипротранс» ОАО тыршоз. «Скоростные линии» ОАО генеральной подряд­чиклэсь ужзэ быдэсъялоз. Вуоно арын поезд сюрес лэсь­тонэн герӟаськем бусы ужъёс радъяськозы.

      БР-ысь Транспортъя но сюрес хозяйствоя кун комитетэн кивалтӥсьлэн Олег Гилевлэн кылъёсызъя, ВСМ ӝутон программа 2030-тӥ арозь кыстӥськоз. 2018-тӥ арозь Казане вуттӥсь сюрес дасямын луоз. Республикая­мы рокадной сюрес тупатон ужъёс 2024-2026-тӥ аръёсы йылпумъямын луыны кулэ. Со сюрес Янаул, Краснокама, Татышлы, Балтач, Благовещенск, Бирск, Уфа но Мишкино ёросъёс пыр ортчоз. Башкортостанлэн шоркарысеныз Пермь шаерозь нуналаз 19 куз электричкаос ортчозы.

      Калык пӧлын радъям кенешонъёсын скоростной поездъёсы билет дунэн тунсыкъяськисьёс но луизы. Туннэ нуналэ 2026-тӥ арысь дунъёс сярысь вераны шугъяськоно ке но, Олег Гилев дунъёс «вормымонэсь» луозы шуыса оскытӥз. Солэн верамезъя, ВСМ ӝутонэ республикаысьтымы ужасьёс кыскемын луозы. Поезд сюрес ӝутонлы Национальной благосостоянияя фондысь коньдон висъяськоз.

      Дасяз Миляуша БУЛАТОВА.

      Рубрики:

      Номер:

    • отправить другу
    • распечатать
    • Комментарии

      Имя
      E-mail
      Текст
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
      Отправить
      Сбросить