icon_gotop
18+
autorisation
Войти | Регистрация
Время в Татышле
05:49
Пятница, 29 Марта
Рекламный баннер 990x90px top

«Шуныт коркан» шуныт пумиськон

10:13 24.10.2013

Бадӟым Гондыр гуртысь культура юртын ужась Вячеслав Менкаметович Менликаевен улэм-вылэмзы сярысь вераськыса пукыку, со шуак ӵектӥз:

- Ойдолэ «Шуныт корка» вамыштоме. Мон тӥледыз туж тунсыко адямиосын тодмато.

- Шуныт корка...тунсыко адямиос - бӧрсяз ас поннам малпаськыса вамыштӥсько.

Тани, культура юртысь по­тыса, матаз сылӥсь юрт вӧзы дыртӥськомы. Юрт борды йыгам пулэ «Шуныт корка» гожтэм кылъёс син шорам соку ик йӧто.

Ӧсъёсты усьтыса пырем бере, монэ гурт поселениысь ветеранъёслэн советэнызы кивалтӥсь Владислав Саби­рович Казначеев пумитаз.

- Пырелэ, ортчелэ, шуныт коркамы куноосты шумпоты­са пумита. Тани «Купанча» фольклор ансамбле ветлӥсь арлыдо артистъёсмы репетицие вуозы. Ми котькуд нунал татчы ӵошен люкаськиськомы. Пӧртэм ужрадъёсты, праздникъёсты ӵошен ортчытӥськомы, вордскем нуналъёсмес но пусйиськомы. Одӥг ар талэсь азьвыл асьме кужымен вуж юртэз тупатӥм, ужбергатӥсьёс Василий Сагбиев, Марат Хамитов, Олег Кабибзянов евро ӧс, укноос пуктӥзы. Шутэтскон юртмы табере трос арлыдоосты огазея. Ог-огенымы пумись­кыны, вераськыны, шулдыръяськыны шуыса татчы вуиськомы. Быгатэммыя ёросын, Пермь шаерын спортъя, культурая ортчись ужрадъёсы пыриськиськомы. Ёросысь ветеранъёслэн советэнызы кивалтӥсь Василий Иванович Головков милемлы котьку юрттэ. Шулдыр улӥськомы!

Владислав Сабировичен вераськыку синъёсы «Шуныт коркалэн» пушкытӥз лушкемен ортчо. Ӝикыт коркан югыт, борддор вӧзын чай юон тӥрлыкъёсын тырем стенка сылэ. Укноос, ӧсъёс вылесь, ӝӧкъёс вылын шашкиос, шахматъёс адӟисько. Тани корка оген-кыкен арлыдо песянай-песятайёс вуылыны кутскизы. Выль тодмоосме песянай-песятай шуыны ик возьыт кадь. Соос егит мылкыдо, задор но сэзь адӟисько на. Синъёссы кыӵе ке аспӧртэм тылын ӝуало, ымныръёссы сайкытэсь, пальпотыса, мусояса кадь шоре учко. «Шуныт корка» вуэмъёс пумен трос­гес но тросгес луизы, висъет жингрес куараосын, сюлмысь вераськонъёсын тырмиз.

Пайдаё но шулдыр орт­чо Бадӟым Гондыр гуртысь арлыдоослэн нуналъёссы. Концертъёсы, пӧртэм ӵошатсконъёсы вуылэмзы сяна, соос мыным трос тунсыкозэ но паймымонзэ веразы на. Кылсярысь, Выль арез, нюлэскы потыса, тылскем котырын пумиталлям. Турслётъёс, пӧртэм экскурсиос малпаса, ӵемысь пӧртэм городъёсы, театре, зоопарке, цирке огӵошен вуыло. Тол куазен куас вылэ султыса нискыланы ветло, нош тулыс, льӧмпу сяськаян вакытэ, нюлэскы льӧмпу сяськаез адӟыны потало.

- Чебер тодэ ваёнъёсын тырмем нуналъёсмы азьланяз но трос мед луозы на, ог-огенымы пумиськыса улыны тыршомы, - оскытӥзы монэ Бадӟым Гондырысь «Шуныт корка» ветлӥсь арлыдоос.

Ас улондэ шулдыр карыны котьку но луэ, ӟеч мылкыд но лул-сюлэмыдлы матын луись адямиос вӧзад луизы ке. Нош арлыд? Арлыд номырлы уг люкеты, адями дунне вылын одӥг пол гинэ улэ ук.

Ирина САМИГУЛОВА.

Пермь шаерысь Куеда ёрос.

6859

Оставить сообщение: