- Эдуард Сафаргалиевич, тӥ кемалась-а руль сьӧрын?
- Кемалась, школаез йылпумъям дырысен. Соку мон Бирскысь ДОСААФ-е дышетскыны пыри. Бӧрысь армие мынон дыр вуиз. Отын но мон одӥг ар но куать толэзь ӵоже пӧртэм бадӟым машинаосты нуллӥ. Водитель луон мылкыды пичи дырысен малпанъёсам улӥз. Мукет уж быръён сярысь мон ноку ӧй малпаськы. Армия бере вордскем гуртам бертыса, 1990-тӥ арын «Урал» колхозын ужаны кутски . Отын мыным бензин нуллон машина ӵектӥзы. Куинь ар ужам бере, кузпалъяськи но Вылысь Татышлые улыны выжимы. Татын ЖКХ-е водитель луыса интыяськи. Берло сизьым ар ӵоже аптекаын водительлэсь ужзэ быдэсъясько. Машинатэк улыны ик уг быгатӥськы ни, дыр. Дорам но кык машинае. Кема ӧвӧл грузовой машина басьтӥ. Хозяйство луэм бере, бадӟым машинатэк уг луы. Турынзэ но, пузэ но ваёно. Туннэ нуналэ грузовик коньдон ласянь шӧдскымон юрттэт возьматэ ке но шуи уг янгыша, дыр. Вазиськисьёс трос пумисько.
- Азьло но али сюрес вылын ветлонэз ӵошатоно ке, тӥмар верасалды? Кузь сюрес тӥледыз уг кышкаты-а?
- Зэм, сюрес вылын луэм кышкыт учыръёслэн лыдзы нуналысь нуналэ йылэ. Азьло сюрес вылын машинаос ӧжыт ке но вал, сюресъёс ӟечлыкенызы ӧз висъяськылэ. Авариос азьвыл но луылӥллям, тросэз со сярысь тодӥллямтэ гинэ. Мон малпасько, кышкась адями руль сьӧры ноку уз пуксьы. Кузь сюрес вылэ потыку, мон одно ик ӟечез сярысь малпаськисько.
- Юыса руль сьӧры пуксись адямиос сярысь малпанды кыӵе?
- Юэм муртлэн кышканэз ыше-быре, шуо. Соин ик курытсэ веръям адями кышкытлык лэсьтэм бераз гинэ янгышамез сярысь малпаськыны кутске. Юыса машинаен ворттылӥсьёс ӧй луысалзы ке, сюрес вылын бырыны шедем адямиослэн лыдзы трослы улӥын луысал.
- Куарусён толэзьысен водительёслы чаклам выль куронъёс, бадӟымесь штрафъёс юрттозы меда янгышасьёсын нюръяськыны? Кызьы тӥ малпаськоды?
- Янгышасьёсын одно ик нюръяськоно, сотэк нокызьы уг луы. Но водительёслы чаклам куронъёсты тӥясь адямиез капчиен визьноданы уз луы, дыр. Вань сыӵе адямиос, кудъёсыз мукетъёс сярысь малпаськыны дышемын ӧвӧл: кызьы соос азьло ветлӥллям, азьланяз но озьы ик штрафъёс, куронъёс сярысь малпаськытэк «лобалозы».
- Азьланезлы кыӵе малпанъёсты?
- Азьпалан но сюлмылэн ӵектэмезъя быръем удысам ик тыршыны малпасько. Котькыӵе кышкытлыкъёс, секытлыкъёс ке но луизы, рульме мон нокыӵе мукет ужен уг вошты. Уго котькуд ужлэн но шуг-секытъёсыз луо. Туала улонын номыр капчиен уг сётӥськы. Каньыл улон понна трос тыршоно, кужымез, дырез жалятэк ужано.
- Бадӟым тау, Эдуард Сафаргалиевич. Шудо сюрес тӥледлы!
Вераськиз Миляуша
БУЛАТОВА.
Татышлы ёрос.
Оставить сообщение: