Калык соослы оске

Малпанзэ улонэ пыӵатон вылысь, Сергей пичиысен та­залыксэ кыдатонлы бадӟым саклык висъям, пӧртэм спорт видъёсын эшъяськем. Шко­лаын дышетскыкуз пӧртэм ӵошатсконъёсы пыриськыса, вормонъёслы кузё луэм. Со капчи атлетикаын, куасэн бызьылонын тужгес висъ­яськем.

Дас одӥг ар ӵоже одӥг малпанэн улэм пияш, 2008-тӥ арын пӧсьтолэзе, ЕГЭ сётэ­мез бере, Екатеринбургысь Вылӥ артиллерийской ко­мандной училищее (ЕВАКУ) вуэ. Азьпалан – куать толэзь ӵоже дорлэсь, анай-атайлэсь, матысьёслэсь мӧзмон, секы­тэсь эскеронъёс пыр потон. Быръем удысэзлэсь секыт­лыксэ ӟеч валась пияшез шуг-секытъёс уг куасалто. Сергей курсант луэ.

Куинь ар дышетскемзы бере, курсантъёсты Санкт-Петербургысь Михайловской академие выжто. Берлось кык арзэ Сергей отын тодон-валан басьтэ.

Кылем арын Сергей ды­шетсконзэ йылпумъяз. Али дыре лейтенант - Москва улосвылысь Калининец посё­локысь Таманской дивизиын 2-тӥогневой артиллерий­ской взводын командир.

- Ортчем аръёсы берыт­сконо ке, быръем удысад нырысетӥ вамышъёсыд ся­рысь мар верасалыд? – юась­ко офицерлэсь.

- 2008-тӥарысь гуды­рикошкон толэзез ноку уг вунэты. Мон соку егит бо­ецлэсь курсъёссэ пыр потӥ. Кыӵе гинэ эскеронъёс ӧй вал! Кылсярысь, вазь ӵукна кезьыт вуын но уямы, бӧрысь кот дӥськутъёсын олокӧня иськем нюжтӥськыса но вет­лоно луимы. Секыт вал, но чидамы. Нырысетӥ отпуск! Курсантъёс пӧлын со «мамин отпуск» шуыса вӧлмемын. Доре бертонэз витем нуналъ­ёс, анайлэн пумитамез но кемалы тодэ кылизы, шуыны луоз.

- Военной луыны малпась пиослы кыӵе ӵектонъёсыд?

- Школаын ӟеч тодон-валан басьтон сярысь мед сюлмаськозы. Тазалыко уло­нэн мед эшъяськозы. Уго во­енной луыны малпасьёслэсь нырысь ик тазалыксэс эске­ро. Физической дасьлыклы но бадӟым саклык висъяно. Егит боецлэсь курсъёссэ вормымтэ пияш, военной лу­ыны уз быгаты, сое быръем дышетскон юртаз дышет­скыны уз кутэ. Службаез то­дон-валан басьтэм аръёсын ӵошатоно ке, дышетскон трослы секытгес сётӥське, - шуэ Сергей.

Шуг-секытъёс вормемын. Пичи дырысь малпан быдэс­мемын. Азьланяз егит офи­церлэн выль вормонъёсыз, дано ужъёсыз трос луозы на шуыса оскон кылдэ.

Миляуша БУЛАТОВА.

Татышлы ёрос.