«Вамыштоно ке, мед кылёз пытьы…»

   Ренат Биктимирович Татышлы ёросысь Арибаш гуртын  дышетӥсьёслэн семьяязы вордӥськем. Ньыль нылпи будӥллям  соос. Пичи пияш ас ёзъёсызлэсь номырин висъяськымтэ.  Эшъёсыныз шудыса-бызьылыса будэм. Арлыдыз вуыса, со  Кардон гуртысь покчиёзо школае вамыштэм. Солэн сюлмаз  тужгес но «биниськылӥллям» физкультурая урокъёс.  Шумпотыса вите вылэм со Галинур Ахматнурович  Ахматнуровлэсь урокъёссэ. Спортэз гажан мылкыдыз со  дырысен ик пуромем, лэся.

   Толэз воштэ гужем, одӥгзэ арез – мукетыз. Кардон школаысь  нылъёс но пиос Вылысь Татышлыысь шор ёзо школае  дышетскыны выжиллям.

  - Татын физкультураез Закир Лукманович Лукманов  дышетӥз. Со туж зол куронъёс пуктэ вал, - уно аръёслэн  мышказы кылем вакытэз тодаз вае Р. Галямшин.

   Вуоно спортсменлы тужгес но удалтэм Дуванысь техникумын.  Татысен со зэмос спорт дуннее бадӟым вамыш лэсьтэм. Куасэн  тренерез СССР-ысь физкультура удысысь сӥё-дано ужась  Николай Емельянович Веремей студентлэсь спортэн эшъяськыны бугырскем мылкыдзэ ӝог валам. Со синйылтэм студентсэ кыдатонлы трос дырзэ сӥзем. Куасэн бызьылон сяна, Ренат Биктимирович капчи атлетикаын но усточи вылэм. Та ӧре сое СССР-ысь спортъя мастер Валерьян Давлетович Хужин кыскем. Ренат Биктимирович капчи атлетикая тренерзэ шуныт тодэ ваёнъёсаз возе. Уго В. Хужин солэн данъяськымон, адӟем карымон но гажамон адямиез вылэм.

Лобӟо-тӧлӟо аръёс. Дува­нысь техникум бере, гужем Р. Галямшин «Социализм» колхозын (туала «Рассвет» АО) ужам. Бӧрысь вить ар ӵоже Башкир сельхозинститутысь агрономъёсты дасянъя факультетын тодон-валанзэ будэтэм. Спортэн «ӝуась» студент татын но куасэн бызьылонлэсь палэнскымтэ. Арысь аре кыдаса, со вылӥ вормонъёслы кузё луэм.

- Тренереным, СССР-ысь физкультура удысысь сӥё-дано ужасен, Александр Адольфович Книссэн ми кытчы гинэ ӧм вуылэ: Красноярске, Минске, Мурманске, Свердловске, Ижевске, Перме, Болгарие, Чехословакие. СССР-ысь вылӥдышетскон юртъёс пӧлын радъяськем ӵошатсконъёсы, ВЦСПС-лэн чемпионатъёсаз пыриськылӥмы. Олимпиадаосын но дунне ӵошатсконъёсын чемпион нимлы кузё луэм спортсменъёсын но артэ бызьылыны гожтӥз. Тыршеме юнме ӧз луы, 1973-тӥ арын мыным СССР-ысь куасэн бызьылонъя спортъя мастер ним сётӥзы, - ортчем аръёссэ син азяз пуктыса вера Ренат Биктимирович.

Институтсэ йылпумъямез бере, Р. Галямшинэз Перме но, Ижевске но спорт удысэ ужаны вазё вылэм. Нош сое дор палъёсыз кыскиллям. Быръёнэз юнме шорысь луымтэ, солэн гурт удысын лэсьтэм ужъёсыз номырин мертаны луонтэмесь. Кема аръёс ӵоже Ренат Биктимирович «Дэмен» хозяйствоен кивалтӥз. Вакытаз дэменъёс азьветлӥсь, кужмо хозяйствоослэн радазы лыдъяськизы. Уждураз учкымон, вылӥ дунъет сётымон ужъёс быдэстэмез понна, кивалтӥсьлы РФ-ысь гурт удысысь сӥё-дано ужась ним сётэмын. БАССР-ысь вылӥ Советлэн Данъян грамотаез, БР-ысь Президентлэн тау карон гожтэтъёсыз, Татышлы ёрос администрацилэн уно пӧртэм Данъян грамотаосыз Ренат Биктимировичлы азьвыл ужам аръёссэ ӵем тодаз вайыто. Ужан аръёсаз кивалтӥсь Кузёбай Гердлэн премиеныз но пусъемын вал. 2009-тӥ арын БР-лэн Президентэз М. Рахимов удмурт кивалтӥсьлы Калыкъёслэсь эшъяськон ордензэс сётӥз. 2011-тӥ арын сое «Трокай Борисов 1891-2011» Синпелет медален данъязы. Арлыдо воргорон БР-ысь Калыкъёслэн эшъяськон юртсылэсь Данъян грамотаоссэ арлы быдэ басьтэ.

«Дэменын» ужамез сярысь Р. Галямшин олокӧня час дугдылытэк вераны-мадьыны быгатэ.

- Гурт удысэ нырысетӥ ва­мышъёсме лэсьтыкум, мыным бадӟым юрттэт возьматӥз райкомпартилэн нырысетӥ секретарез Радиль Мухаметдинов. Ужаны мылкыдзы луэм адямиослы со котьку дурбасьтэ вал. Радиль Кияметдинович мынам кенешчие но луиз, - шуэ Ренат Биктимирович.

Гуртъёсы нылпи садъёс, магазинъёс, школаос, спортзалъёс, клубъёс ӝутэмзэс, сюрес лэсьтэмзэс, гурт ульчаосы газ, ву гумыос кыскемзэс со туннэ кадь тодэ на. Ренат Биктимирович со аръёсы трос шуг-секытъёсын пумиськем. Озьы ке но чидам, котькуд кутскем ужез солэн йылаз-пумаз вуттэмын.

Туннэ нуналэ гурт удысын кылдэм югдур Ренат Биктимировичез туж ӝожомытэ. Солэн малпамезъя, гурт хозяйствоос кун юрттэт луымтэен курадӟо. Гуртын поттэм вузъёсты – сӥлез, йӧлэз, ю тысез – кунмы ичи дунэн басьтэ. Нош ГСМ-лэн, техникалэн дунъёссы матэ лыктымон ӧвӧл. Уг ке тырмы, дунъёс нуналлы быдэ сямен йыло. Соин ик хозяйствоос «чуто», ужасьёссылы дыраз уждун тырыны луонлыкъёссэс ышто. Берло дыре хозяйствоосын ужась киослэн тырмымтэоссы юн шӧдӥське.

Кивалтон Галямшинъёслэн виразы пыӵамын, шуыны луоз. Али дыре дано кивалтӥсьлэсь ужъёссэ Рустам пиез азинтэ. «Агрофирма «Дэмен» СПК-ен Рустам Ренатович 2010-тӥ арысен кивалтэ.

Улон интыяз уг сылы, азьлань дыртэ. Котькуд выль нуналэн выль ужъёс вордӥсько. 1996-тӥ арысен Ренат Биктимирович Башкортостанысь удмуртъёслэн национально-культурной центренызы кивалтэ. Та ужзэ но со синмаськымон нуэ. НКЦ кылдэм бере удмуртъёс понна кӧня ӟеч ужъёс быдэстэмын ни. Соосты лыдъяса но уд быдты. Кылсярысь, «Ошмес» газет, «Усточикар» лагерь. Кема аръёс ӵоже ини газет удмурт калыклэсь вормонъёссэ котыре вӧлмытэ. Газет бамъёс пыр шаермылэн пӧртэм ёросъёсаз улӥсь удмуртъёс ог-огенызы, возиськем сям-йылолъёсынызы тодматско. «Усточикар» лагерь дас арлэсь ятыр ужа. Со удмурт нылпиосты огинэ люка, анай кылзэс дышетонэ, калык сям-йылолъёсты утёнэ но улӟытонэ бадӟым люкет пыртэ. Трос усточи удмурт пиналъёс со пыр потыса, туннэ нуналэ но лагерь сярысь шуныт тодэ ваёнъёсынызы уло, отын тодматскем эшъёсынызы аръёс ӵоже кусып возё.

- Мон – удмурт. Соин туж данъяськисько, - шуэ Р. Галямшин. – Ас калыке понна лэсьтэм ужъёсылы мон шумпотӥсько. Пичи дыръя атае мыным ӵемысь вера вал: адямилы ӟечлык лэсьтыны быгатӥськод ке, сыӵе ужез одно ик быдэстоно, пе. Улонын ӟеч уж ӟечен ик берытске. Котькуд уж борды басьтӥськыкум, мон атайлэсь кылъёссэ тодам ваисько. Уж пӧрмемъя, выль ужъёс лэсьтыны мылкыды бур­дъяське. Берло дыре, конечно, тазалыке уг шумпотты. Соин ик преемник дасян бордын тыршисько: НКЦ-лэн кужымез азьпалан но шӧдскымон мед луоз. Удмуртъёс понна со пайдаё ужъёс мед быдэстоз.

Удмурт калыклэсь культуразэ, кылзэ, сям-йылолъёссэ утёнлы, азинтонлы, калыклэсь данзэ ӝутонлы вань кужымзэ понэм воргоронлэн ужан аръёсыз удалтӥллям. Та ӧрын но солэн вормонъёсыз трос. Башкортостанысь, Удмурт Элькунысь Правительство но Ренат Биктимировичлэн тыршемезлы вылӥ дунъет сётэ.

Ужаз азинлыко тыршыса, дано нимъёслы, бадӟым вормонъёслы кузё луэмез понна, Ренат Биктимирович кузпалызлы Расима Муллакаевналы, нылпиосызлы пумтэм тау карон кылъёссэ вера. Арлыдо воргорон али ӟеч вала: трос дыръя солэн сюлэм шунытэз, кенешъёсыз матысьёсызлы тырмыт луымтэ шуыса.

- Ортчем аръёсы сюрес ке луысал, мон эшшо но кужмо­гес ужасал. Улон сюресме но ӧжытак воштысал: спортлы но тазалыкелы тросгес саклык висъясал. Адями улоназ одно ик мукетъёслы адӟем карымон пытьы кельтыны кулэ, - вераськонмес йылпумъяса шуиз Ренат Биктимирович.

Миляуша БУЛАТОВА.

Татышлы ёрос.