Ӟеч луы, тол куазь! Ӟечбур, тулыс!

Алтауын «Вӧй келян» ужрад табань пыжонысен кутскиз. Со сярысь библиотекарь Альфира Миниахметова сюлмаськиз. Гуртомы Анатолий Галиханов выль пыжем табанен шудбур, тазалык, тупаса улон курыса, Инмар Кылчинлы йыбырттӥз. Ужрадэ алтауос пӧръёсынызы вуизы. Огазе кариськыса, соос бадӟым ӝӧк сьӧрын ческыт чай юизы.

Праздникез ортчытон сярысь тужгес сюлмаськиз гуртысь клубен кивалтӥсь Ирина Шарафутдинова. Вунэм йылолэз улӟытонлы со пыр-поч дасяськиз. Калык люкаськоз меда шуыса малпаськонъёсыз но трос луизы.

Та нуналэ гурт калык усто шулдыръяськиз: куасэн, салазкиен, корытоен нискылазы. Гозы кыскан но тунсыко пӧрмиз: Ваннапалан, Уллапалан, Шординын, Вылысь урамын улӥсь пиналъёс вӧзы бадӟымъёс, арлыдоос ватсаськизы на. Эктыса, кырӟаса, лымыын погылляськыса ортчиз Вӧй келян. Берло ини, кезьыт толэз келяса, куро мунёез ӝуатӥзы. Праздникен «ӟырдам» калык ӝуась мунё котырын но эктӥз. Ужрадэз йылпумъяса, гуртоос ог-огзылы капчилык, вуоно бусы-бакча ужъёсазы азинсконъёс сӥзизы, ужрадэз дасямзы но нуэмзы понна Ирина Шарафутдиновалы, Альфира Миниахметовалы, Зилина Мухаметхановалы, Виталий Мухаметхановлы, Виктор Гайниевлы, Эдуард Фаизовлы, Ирик Султанахметовлы, Руфина Хазиахметовалы тау карон кылъёссэс веразы.

* * *

Екатеринбургысь удмуртъёслэн «Эгес» огазеяськонзылэн ужъёсаз пырись­кисьёс Вӧй арняез пайдаё но шулдыр пумитазы. «Азвесь гур» фольклор ансамбле ветлӥсьёс улосвылысь сӧсыръёслэн тазалыксэс юнматон центразы вуылыса, концерт возьматӥзы. Концерт программае «Вӧй келян» йылолэз пыртӥзы, артистъёс учкисьёслы удмурт, ӟуч калык кырӟанъёсты кузьмазы. Центрысь ужасьёс но йӧнатскыны вуэм висисьёс артистъёслы тау каризы, нош ик доразы вуылыны куризы.

Пумиськонмы «Зелёная роща» шутэтскон интыын азьланьтӥськиз. Татын ми толэз келямы но тулысэз пумитаса, кырӟаса эктыса, люкаськем калыкез шулдыртӥмы, пӧсь табанен куноямы. Милемын артэ чуваш калык автономие пыриськисьёс но луизы. Ӝӧк вылмес удмурт калыклэн пӧръёсыз но декоративно- прикладной творчествоя ужъёс шулдыртӥзы. Празднике вуэмъёс пӧлын чырс табанен секталоды-а шуыса юасьёс трос луизы. Пӧръёсмы туж ӝог быризы, нош табаньёсмы тужгес кельшизы.

Вӧй келянэ пӧртэм дышетскон интыосысь вуэм студентъёс, школаосын дышетскись пиналъёс но лыктӥзы. Соос понна конкурсъёс но ӵошатсконъёс луизы. Нош пичиос гурезетӥ нискыласа, валъёсын ворттылыса, сульдэр котырын кырӟаса шутэтскизы. Тани вуиз праздниклэн «шор сюлмыз» - сульдэр ӝуатон дыр. Ӟечбур, Тулыс! Ӟеч лу, Толалтэ! Вӧй келян праздник усто пӧрмиз. Шумпоттэ соиз но: таяз праздникын пӧламы трос удмурт егитъёс луизы. Ӵошен шулдыръяськыса, огазе кариськыса, сюлэмамы ас кылмес но удмурт калыкмес яратон мылкыд азьлолэсь но юн луэ.

Дасязы

Марина ГАФУТДИНОВА,

Марина ЯГУТКИНА.