Котьку мед луоз анай

Венера апай бадӟым семьяын будӥз. Солэн анай-атаез куать нылпи будэтӥллям. Озьы ке но Венера апай ноку вить пиналъёслэн анайзы луон сярысь малпаськымтэ. Нош улонын малпам сямен гинэ уг пӧрмы вылэм. Венера апай бадӟымзэ Андрей пизэ 19 аресаз вордэм. Семьяязы со трос шумпотон пыртэм. Нош туннэ Андрей семьяезлэсь палэнын улэ ни, Казаньын менеджер луыса тырше. Озьы ке но со ӵемысь дор палъёсаз вуылыны тырше. Уго татын сое шумпотыса возьмало, выныз, куинез сузэръёсыз котьку мӧзмо. Нош гужем куазен юрт котырын воргорон киос мултэс уг луо. Венера апай Александр кузпалыныз та вакытэ угось трос ӟазег-ӵӧж вордыны тыршо. Со сяна, гидазы но пудооссы ӧжыт ӧвӧл. Соин соослы сиён дасян сярысь но трос сюлмаськоно. Та выллем ужъёсын бадӟымъёслы нылпиоссы зэмос кивоштӥсьёс луо. Аэлита туннэ Калтасыысь шор ёзо школаын тодон-валан басьтэ. Нош дышетсконэз бере анаезлы пӧртэм ужъё­сын юрттӥськыны дыртэ.

Шутэтскон нуналъёсы солы Нефтекамскысь машиностроительной колледжын дышетскись Алексей агаез но юрттӥське. Ми вуылон нуналэ но Алёша со выллем сюлмаськонъёсын улӥз, кӧснуналэ мунчо, пе, эстоно. Уго та нуналэ соослэн быдэс семьязы ӵемысь огазе люкаське. Агайзы гинэ палэнэ кыле. Нош Сарапулысь медколледжын дышетскись Алесия апайзы семьяязы эмеспи но вуттӥз ни. Пӧсь гужем нуналъёсы соос шулдыр сюан ортчытыны малпало.Озьыен, выль семья вордӥськоз…

Нош таиз семьяысь пичиезлы ныллы ньыль арес гинэ тырмемын на. Озьы ке но Арина мугорыныз но, быгатонлыкъёсыныз но трослы бадӟымгес адӟиське ни. Со удмурт, ӟуч кылъёсын чебер вераське, англи кылын лыдъяськыны йӧндыре. Гуртазы нылпи садзы ке но ӧвӧл, нылпиос, шӧдӥське, котыр ласянь усточи луыса будо. Озьы ке но солэн кулэлыкез шӧдскымон, уго гуртысь анайёслэн нылпизэс утён дырзы трослы кемагес кыстӥське. Пиналъёсты огназэс кельтыса ужаны уд поты уго. Венера апайлы та ласянь удалтӥз, нылпиосыз песяенызы будо.

Венера апай туннэ нылпиоссылэн вормонъёссылы шумпотонэн улэ. Тӥни ук Аэлитазы котьку сямен чебересь суредъёсыныз паймытъя, нош Алесиязы туэ диплом басьтоз… Пиосыз но дорысьёссылы шуныт иворъёс гинэ вуттыны тыршо. Нылпиосыз ик анаймуртлы улонысьтыз пӧртэм шуг-секытъёсты вормыны, азьлане вамыштыны юрттӥзы. Нош туннэ соослэн семьяязы валтӥсь инты сётэмын шуд­бурлы, шумпотонлы, ог-огдэ валанлы но гажанлы.

Ольга

НИГАМАТУЛЛИНА.

Калтасы ёрос.