Пичиос шумпото - нылпи садэ ӵукна дырто

Вераны кулэ, гуртсы бадӟым ке но, Сандугачын улӥсьёс кемалась нылпи садтэк курадӟизы. Выль школазы ӝутӥськыку ик ини нылпи садлы висъетъёс чакламын вал. Табере нылпи садэ 25 пичиос ветло. Пиналъёс куинь аресысен куать аресозь луо. Та дыре нылпи садын пиналъёсын Айгуль Шарафутдинова, Людмила Гадиятова ужало. Нош нылпи садэн Светлана Тагировна Мардамшина кивалтэ. Аслаз малпанъёсыныз люкиськыса, Светлана Тагировна вераз:

- Та нуналъёсы ми федерал государственной куронъёсъя (ФГТ) ужаськомы. Пиналъёс удмурт, ӟуч, бигер кылъёсты дышето. Нылпиос пӧлын пиос тросгес луо. Кызь вить пиналъёсмы понна кӧлон интылы, сиськыны, шудыны но пӧртэм занятиос ортчытъяны дасям висъетъёс вань. Сиён пӧраны школаысь столовое ветлӥськомы.

Светлана Тагировна Нефтекамскысь педучилищеез йылпумъям. Со сярысь ас удысаз выль адями луэ шуыны уг луы, малы ке шуоно Светлана Тагировна азьвыл Барабановкаысь нылпи садын дас арлэсь кема ужам ини. Ми куное кожылыку, пичи нылъёс но пиос ас дуннеязы «пӧзё» вал. Котыре жингрес куараоссы, тыпыртэмзы но серекъямзы чузъяськыса улӥз.

- Туннэ милям анай-атайёсын собрание луоз, - вераз Светлана Тагировна. Ми ужзэс ӧм ӝегатэ ни, пиналъёс дорысь потыны дыртӥмы. Нош пичиос милемыз киоссэс шонаса келязы. Сандугачысь нылпи садэ ветлӥсь пичи нылъёслы но пиослы азинскон сӥзёме. Туж трос дыр уз ортчы, соос нырысетӥ классэ дышетскыны лыктозы. Нылпи садын басьтэм тодон-валанзы соослы визьмо луыны юрттоз. Азьланяз пӧлазы трос усто дышетскись пиналъёс но луозы. Ӟеч сюрес тӥледлы, пичиос! Нош анай-атайёслэн нылпиоссэс интыян сярысь сюлмаськонзы ӧвӧл ни, табере пичиослэн нылпи садзы вань.

Ирина САМИГУЛОВА.

Янаул ёрос.