Таиз арысь ӵошатсконмы, куазь кезьыт луэмен, ӧжытлы бергес ке но радъяськиз, 8-тӥюжтолэзе Татышлы ёросысь Выль Татышлы школаысь спортзалэ 14 командаос вуизы. Мукет аръёсын ӵошатыса, туэ отчы тужгес трос командаос люкаськизы. Та нуналэ пиналъёслэн тусъёсазы ӝутскем мылкыд шӧдӥськиз. Эшъёсынызы, тодмоосынызы пумиськыса пиналъёс шумпото, ог-огенызы ӟечбуръясько, пиос ӵошатсконэ вуэм нылъёсты тулыслэн но нылъёслэн праздникенызы ӟечкылало. Котырын эшъяськон мылкыд но командаослэн ӟырдыт шудонын кужымзэс мертаны дасьлыксы адӟиське. Син азям пӧртэм аръёсы ортчем ӵошатсконлэн йылпумъянъёсыныз таблица йӧтӥз. Отчы учкыса валамон: кин кызьы шудэм, кыӵе аръёсы кыӵе школаосысь пиналъёслэн командаоссы вормисьёс радын луиллям. Ёросъёсъя учконо ке, Татышлы ёросысь Выль Татышлы, Уразгильды, Улысь Балтач школаосысь пиослэн командаоссы ӵемысь вормылӥллям. Нош нылъёслэн командаоссы пӧлын арлы быдэ сямен Калтасы ёросысь Бадӟым Качак школаысь нылъёслэн командазы азьпалан луылэм. Куеда ёросысь Бадӟым Гондыр школаысь нылъёслэн командазы но вормисьёслэн радазы ӵемысь сылэм. Озьыен, таблицаез учкыса син азе таӵе суред пуксе: ӵошатсконын пиослэн командаоссы пӧлын Татышлы ёросысь Уразгильды школаысь пиослэн командазы (2002-тӥ, 2005-тӥ, 2009-тӥаръёс), Выль Татышлы школаысь команда (2007-тӥ, 2012-тӥ, 2013-тӥаръёс), Куеда ёросысь Бадӟым Гондыр школаысь пиослэн командазы (2003-тӥ, 2006-тӥ, 2008-тӥаръёс) куинь пол вормисьёс луылӥллям. Нош нылъёслэн командаоссы пӧлын Калтасы ёросысь Бадӟым Качак школаысь нылъёслэн командазы кубокез вить пол утэм (2001-тӥ, 2003-тӥ, 2005-тӥ, 2006-тӥ, 2009-тӥаръёс). Куеда ёросысь Бадӟым Гондыр школаысь нылъёслэн командазы куинь пол (2010-тӥ, 2011-тӥ, 2013-тӥ аръёс) азьпалан луэм. Таиз арысь ӵошатскон кыӵе йылпумъян лэсьтоз? Дас витетӥ ползэ «Ошмес» газетлэн кубокезлы радъяськем волейболъя нюръяськон кыӵе командалы шумпотон ваёз? Кинъёс кужмогес луозы? Кубокез кузёос, выль татышлыос, доразы кельтыны быгатозы. Яке со Калтасы ёросэ, яке Янаул ёросэ кошкоз? Та выллем юанъёс омырын бергазы-поръязы ке но, соослы валэктон сётыны нокин уз быгаты, ваньзэ шудон гинэ возьматоз.
Шудонъёс Выль Татышлы, Улысь Балтач но Уразгильды школаосысь спортзалъёсын мынӥзы. Таиз арысь ӵошатсконэ асьсэлэсь кужымзэс мертаны пиослэн тямыс но нылъёслэн куать командаоссы лыктӥзы. Пиос пӧлын Татышлы ёросысь Улысь Балтач, Выль Татышлы (кык командаез пыриськиз), Вязовка, Калмияр, Калтасы ёросысь Бадӟым Качак, Янаул ёросысь Вуж Варяш но Максим школаосысь командаос луизы. Нылъёс пӧлын Выль Татышлы, Вязовка, Калмияр, Улысь Балтач школаосысь (Татышлы ёрос), Калтасы ёросысь Бадӟым Качак школаысь но Куеда ёросысь Бадӟым Гондыр школаысь командаос луизы.
Ӵошатсконэз усьтыса но пиналъёслы выль вормонъёс сӥзьыса «Ошмес» газетлэн валтӥсь редакторез А. Г. Зайноков, Башкортостанысь удмуртъёслэн ИКЦ-енызы кивалтӥсь Т. Н. Шайбакова, Татышлы ёрос Кенешлэн секретарез Р. Г. Рахимов, Выль Татышлы гурт поселенилэн администрациеныз кивалтӥсь Н. В. Рахимьянов, шудонлэн валтӥсь судьяез А. И. Сабанчин вераськизы.
Тани кутскизы шудонъёс. Уразгильды школаысь спортзалын куспазы нюръяськизы Выль Татышлыысь кыкетӥез команда, Вязовка, Бадӟым Качак, Вуж Варяш школаосысь пиослэн командаоссы. Татысен тодмо луиз: Бадӟым Качакысь но Вязовкаысь пиослэн командаоссы, тросгес очкоос люкаса, финалэ матэктӥзы. Нош Вуж Варяшысь пиос зол ке но шудӥзы, та нуналэ соослы ӧжытлы ӧз удалты.
Выль Татышлы школаысь спортзалын Выль Татышлы, Калмияр, Улысь Балтач, Максим школаосысь вуэм командаос кужымзэс мертазы. Татын но нюръяськонлэн зол пуромемез шӧдӥськиз. Калмиярысь пиослэн командазы ӵошатсконэ зол дасяськыса лыктэм. Туп выж вылэ ик уг усьы, очкооссы но тросгес луо, шудонзы но капчигес пӧрме. Калмиярысь командалэн огъя нюръяськон мылкыдыз учкисьёслы тужгес кельшиз. Озьы ке но азьланяз та выллем ӵошатсконъёсы тросгес потано, малы ке шуоно командалэн «лулыз» шудыса, мукет командаосын ӵемгес пумиськылыса юнма, кужмоя. Тренерзы Вилорий Агъяфаров пиоссэ усто дасяны тыршем, соин, лэся, со шудон мынытозь олокӧня пол пӧсям вуэн пыласькиз.
- Олег, приёмдэ возьматы ни. Тупез эн лэзе, юнгес шукке! Шуккиды, эн дугдэ шудэмысь, – кесяське тренерзы.
Омыр пумен ӟырдаз, финал возьматоз ни кинъёс вормись луозы. Финалэ потэмъёс пӧлын Выль Татышлы, Калмияр, Бадӟым Качак но Вязовка школаосысь командаос луизы. Бадӟым Качакысь пиослэн но вормонлы осконзы юн, озьы ке но азьвыл аръёсын ӵошатыса, шудонын соос трос пӧсяно, кужымзэс сётоно луизы. Тани Вязовкаысь команда Калмиярысь командаен ваче пумит луэ. Соос шудыку борддоръёс но ӟырдазы шуыны луэ. Я калмияръёс азьпала пото, я вязовкаос. Азьпалан Вязовкаысь пиослэн командазы луыса, шудон 2:1 лыдпусэн йылпумъяськиз. Таяз ӵошатсконын кужмоос пӧлын одно ик Выль Татышлыысь нырысетӥез команда луоз, со котькуд шудонын 2:0 лыдпусэн вормисе потылӥз. Нош кинъёс кыкетӥ но куинетӥ интыосты люкозы? Тани вуэ ӵошатсконлэн пумыз. Вань шудонъёсъя йылпумъян лэсьтэм бере тодмо луиз: кубоклы но нырысетӥ интылы кузё луизы Выль Татышлыысь пиос (тренерзы А. Сабанчин). Кыкетӥ интыын Калмиярысь пиослэн командазы (тренерзы В. Агъяфаров). Нош куинетӥ интыын - вязовкаос (тренерзы Р. Нуриахметов). Бадӟым Качакысь пиослы ньылетӥ интыен гинэ буйгатсконо ке но луиз, та шудонын соос усто нюръяськизы.
Нылъёслэн командаоссы туэ шӧдскымон тросгес луизы. Улысь Балтачысь спортзалын но шудон ӟырдыт мынӥз. Та нуналэ тросэз Бадӟым Качакысь но Бадӟым Гондырысь нылъёслэсь нюръяськемзэс син азязы пуктыса улӥзы. Азьвыл аръёсы сямен ик, татысь командаос пӧлын тужгес зол нюръяськон пуромиз. Зэм, пиослэн шудонэнызы ӵошатыса, нылъёслэн шудонзы лябгес пӧрмиз, спортзалысь омыр но сокем ӧз ӟырда, озьы ке но азьланяз нылъёслэн командаоссылы оскон вань. Татын ини командаослэсь вуонозэс тренеръёслэн тыршемзы но нылъёслэн ӵемгес эшлыко пумиськонъёсын ог- огзы доры вуылэмзы лэсьтоз. Выль Татышлыысь, Вязовкаысь нылъёслэн командаоссы нюръяськон мылкыдын тырмемын ке но вал, вормон доры сюрес соослы ӧз усьтӥськы. Кужмоос пӧлын Бадӟым Гондырысь (нырысетӥ инты) но Бадӟым Качакысь (кыкетӥ инты) нылъёслэн командаоссы луизы. Нош Улысь Балтачысь нылъёслэн командазы – куинетӥ интыын (тренерзы В. Губаев). Татын тренеръёс Г. Тимирбаев (Бадӟым Качак школа) но И. Ахмадуллин (Бадӟым Гондыр школа) сярысь но вератэк уг луы, малы ке шуоно котькуд аре нылъёслэсь командаоссэс дасянэ соос трос кужымзэс поныса ужало.
Дас витетӥез ӵошатскон йылпумъяськиз. Соин валче выль малпанъёс, выль мылкыданъёс, выль сюлэмшугъяськонъёс но кылдӥзы. Пиналъёслэсь шудэмзэс эскерыса вераны луэ: та выллем ӵошатсконъёс нылпиослы вормонлэсь зэмос дунзэ валаны юртто, ёзвиосты кыдато, спортэн эшъяськыто. Тренеръёслэн сюлмысь ужаны быгатэмзы но туала пиналъёслы туж кулэ. Нош ӵошатсконэз радъяку, мед луозы на вылэм спонсоръёс но, малы ке шуоно нылпиослэн вуонозы понна сётэм коньдон ӟечен ик берытскоз. Кин тодэ, оло, та выллем ӵошатсконэ пыриськем пиналъёс пӧлын вуоноын олимпиадаысь зарни медалистъёс но потозы?
Газетмылэн редакциез ӵошатсконэз радъяны юрттэмзы понна Выль Татышлы, Улысь Балтач, Уразгильды школаослэн кивалтӥсьёссылы Р. Г. Гафуровлы, Л. Л. Зидымаковлы но Ф. Г. Бадрисламовлы сюлмысь тау карон кылъёссэ вера.
Ирина САМИГУЛОВА.
Татышлы ёрос.
Оставить сообщение: