icon_gotop
18+
autorisation
Войти | Регистрация
Время в Татышле
21:51
Четверг, 28 Марта
Рекламный баннер 990x90px top

Малпанъёсыз школае вутто

09:29 10.04.2014

Дышетӥсь одӥг минут дырзэ но пайдатэк уг орт­чыты, лэся, котькытчы вут­ске. Ӟеч, пайдаё ужъёсыз дышетӥсьлэн лыдъяса но быдтонтэм. Солэсь вормонъ­ёссэ но ӟеч быдэстэм ужъёс­сэ возьмато трос Данъян гра­мотаосыз, тау карон гожтэтъ­ёсыз. 2001-тӥ арын Александр Ивановичлы «Башкортоста­нысь сӥё-дано дышетӥсь» ним сётӥзы.

- Александр Иванович, спорт ӧрез быръёнды маин герӟаськемын?

- Спортэн тунсыкъяськон мылкыды пичиысен ик пуро­миз. Мынам агае куасчи вал. Солэн ботинкаосын куасъ­ёсыз шоры котьку синмась­кыса учкылӥ. 6-7 арес дыръя агаелэсь куасъёссэ лушкаса кошкисько вал. Тодӥсько на, со понна умой гинэ «усьылэ» вал. Мар карод, сюлэм лыжняе куриське. Нош ик лушкемен кутчасько. Мыжык сиёнтэм вылысь, трос дыръя агаелэсь мур лымыетӥ пегӟылӥ.

Мон азьло аръёсы туж тодмо луэм Бигиней школаын дышетски. Витетӥ классысен физкультурая урокъёсты Вениамин Набиокович На­биоков нуиз. Куасэн ветло­нэн тунсыкъяськемме со ӝог валаз. Куатетӥ классын дышетскыкум котырысь гур­тъёс пӧлын ӵошатскон орт­чиз. Отын нырысетӥ инты басьтӥ. Со дырысен котькуд ӵошатсконъёсы пыриськылӥ.

Вениамин Набиокович Вязовкаысь ветлыса ужаз. Кӧня ке ар ужамез бере, со Бигиней школаысь кошкиз, гуртысьтызы школаязы ды­шетыны кутскиз. Мон 10-тӥ классын дышетскисько вал, физкультурая дышетӥсе вы­льысь Бигиней школае вуиз – тренировкаос «улӟизы».Та арын ик мон ёросын куасэн бызьылонъя чемпион луи.

Школаез йылпумъям бере, армие мынытозь, мыным ас­лам дышетскем школаям ик физкультурая урокъё­сты нуыны ӵектӥзы. Соку ик физкультурая дышетӥсь луон малпанэ кылдӥз. Спорт тылгизьые золгес пуромыса, бадӟым тыллы пӧрмиз.

Армиын но мыным, ку­асчилы, лымыен удалтӥз: служба аръёсы Камчаткаын ортчизы. Отын военной часть, гарнизон понна бызьылӥсько вал.

Армиысь бертон аре Свердловскысь пединститу­тэ, физкультурая факультетэ заочно дышетскыны пыри. Одӥг ар ёросысь Савкияз школаын дышетӥ. Тодам на, сӥзьыл пиналъёсын капчи ат­летикая ёрос ӵошатсконъёсы мынӥм, ужрадысь Кубокен бе­рытским. Школаен кивалтӥсь, дышетӥсьёс вормонмылы нырысь ӧз оске. Милям шко­лаямы спортсменъёс ноку ӧй вал, шуо. Тодӥсько, спорт ӧре кыстӥськись нылпиос коть­куд школаын вань, соосты дыраз синйылтыны быгатоно но тренировкаосы кысконо.

- Улонысьтыды 1975-2012-тӥ аръёс, тодӥсько, Бигиней школаен герӟаськемын. Бе­рытскоме со аръёсы. Мар туж­гес тодады кыльымон луиз?

- 1980-тӥ ар. Соку мон дышетсконме йылпумъя­са, диплом басьтӥ, Москвае Олимпиадае но вуылӥ. Отчы мыныны ёросысь кивалтэт путёвка сётӥз. Мон понна со номырин воштыны луонтэм кузьым луиз. 1987-тӥ арын Башкириысь дышетӥсьёслэн съездазы пыриськи. Отын ик дышетӥсьёслэн быдэсросси съездазы делегатэ бырйизы. Быръем уже нырысетӥ ва­мышъёс лэсьтӥсь адямилы та ужрадъёс выль кужым сётӥзы кадь. Ужын выль вор­монъёс возьматыны мыл­кыд ӝутскиз. 1992-тӥ арын школаен кивалтыны кутски. Кивалтӥсе юнматӥзы ке но, мон спортлэсь ӧй палэнскы. Озьы ик физкультурая урокъ­ёсты нуи. 1998-тӥ арын «Ды­шетон удысысь отличник» нимлы кузё луи. Вормонъёс, усто быдэстэм ужрадъёс выль ужъёслы бурдъяллязы.

- Уж дурын басьтэм вор­монъёс бордын семьялэн кужымез, юрттӥськемез но вань, дыр.

 Кузпалыным, Светлана Минзариповнаен, ми коть­ку ӵошен «пӧзимы»: Арибаш гуртысь Бигиней школае ӟуч кылъя но литературая дышетӥсь луыса лыктэмез дырысен. Азинсконъёсылэн бадӟым люкетэз кузпалы­лэн тыршемез, вӧзам луэ­мез бордын. Мон школаен кивалтӥсь дыръя, со вне­классной ужъёсъя воштӥсе вал. Ужрадъёсты радъянэз но ортчытонэз мон быдэ­сак солы оскылӥ. Тодӥ: со котькинэн капчиен огкыл шедьтыны быгатэ, котькуд ужзэ ӟеч быдэстэ. Светлана Минзариповна котьку монэ валаны тыршиз, али но вала, ноку уг пыкылы. Уго спорт ӵошатсконъёсын сэрен, трос дыръя шутэтскон нуналъёс­ме но дорын ортчытыны уг быгатӥськы. Кузпалы – мы­нам юрттӥсе но, кенешчие но. Нылпиосылэсь но юрттэтсэс шӧдӥсько. Соос котьку мон понна «висё», вормонъёсылы шумпото. Нылъёсы но, пие но спортэз гажало..

 

- Дышетэм пиналъёсты сярысь мар верасалды?

- Дышетэм нылпиосы пӧлысь 40-эз физкультурая дышетӥсьлэсь ужзэ бырйизы. Кылсярысь, Вязовкаысь куа­сэн бызьылонын спортъя ма­стере кандидат Эдуард Наби­оков, Улысь Балтач но Калми­яр школаосысь физкультурая дышетӥсьёс Радмир Губаев, Вилорий Агъяфаров.

- Азьло аръёсы котырын тодмо луись, сяськаясь Би­гиней школаын туннэ нуналэ покчи классъёс гинэ тодон-валан басьто на. Та пумысен мар верасалды?

- Бигиней школа тросэз понна бурмисьтэм яралы пӧрмиз. Мынам отчы кожы­лэме ик уг поты ни. Сюлмы дугдоз шуыса кышкасько. Кӧня кужым юнме кисьтэмын! Котьку кужмоос пӧлын луэм тодон-валан сётон юртлэн данэз ышиз. Азьло Бигиней школаез тодӥсьтэмез ик ӧвӧл вал. Вакытаз отын «А», «Б», «В», «Г», «Д» классъёсын котькудаз 35 пиналъёс ды­шетскизы. Дано суредасьлэн Менсадык Гариповлэн нимыз но ӧз юртты школалы воз­иськыны.

- 2012-тӥ арын тӥ Выль Татышлы школае ужаны вы­жиды. Кызьы тӥледыз пуми­таз выль тодон-валан юрт?

- Выль Татышлы шко­лае вуыса, мон нокыӵе шуг-секытъёсын ӧй пу­миськы. Бадӟым тау школа­ен кивалтӥсьлы Рудольф Гильфанович Гафуровлы, дышетӥсьёслы. Соос монэ шуныт пумитазы, «асьсэлэн» каризы, спорт ӧрын быдэсак эрик сётӥзы.

- Выль Татышлы школа­ын тӥ 9-11-тӥ классъёсын физкультурая урокъёсты но нуиськоды, ёросысь ДЮСШ-ын волейболъя тренер но луиськоды. Кызьы ваньмаз вуиськоды?

- Мон пиналъёстэк но спорттэк улыны уг быгатӥськы. Малпанъёсам - ӵошатсконъёс но вормонъёс­лы оскон. Мылкыд вань бере, ужме быдэстыны но вуисько.

- Тӥляд вормонъё­сты пӧлысь кудӥз тужгес бадӟымез?

- Вормонъёсты лыдъяса но уд быдты. Мон понна коть­куд вормон – бадӟым шумпо­тон. Кема ӧвӧл волейболъя ёрос чемпионатэ пыриським. Пиослэн командазы отысь нырысетӥ интыен берыт­скиз, нылъёслэн – кыкетӥ. 1999-тӥ арын но солэсь бер­гес вордскемъёслэн ёрос чемпионатазы но вормисе потӥм: командаын кык нылъ­ёс но ньыль пиос шудӥзы. «Ошмес» газетлэн Кубокез но куинетӥ арзэ ини Выль Татышлы школае кылиз. Вера­ны кулэ, удмурт школаосысь пиналъёслы радъям спор­тъя фестивальын но мынам дышетэм пиналъёсы усто быгатонлыкъёссэс возьмато. Ужрад дас пол радъяськиз ини. Отын бигинейёс вить пол нырысетӥ интыын луизы.

- Азьланезлы кыӵе мал­панъёсты?

- Спортэн ӝуась сюлмы котьку ӝуалоз. Арлыд йылэ ке но, мылкыд уг пересьмы. Шко­лаен, пиналъёсын люкись­кеме уг поты на. ДЮСШ-ын волейболъя тренерлэсь ужзэ азьланьтыны малпасько. Туэ Выль Татышлы школаын спор­тъя республика фестиваль ортчытыны чакламын. Со сярысь малпаськисько ини: кытын, кызьы радъяно, кыӵе выльдӥськонъёс пыртоно.

- Бадӟым тау, Александр Иванович. Малпанъёсты мед быдэсмозы. Азьланяз кужмо но таланто нылпиосты трос мед луозы.

Миляуша БУЛАТОВА.

Татышлы ёрос.

8506

Оставить сообщение: