Таза анай-атай - шудо нылпи

Та нуналъёсы Татышлы ёросын радъяськем «Трезвое село - норма жизни» семинар но таӵе малпанэн тырмемын вал. Отчы «Трезвый Башкортостан» движение пыриськись Марат Абдуллин но РАН-лэн Уфаысь научной центрысьтыз социальной эскеронъёсъя институтысьтыз научной сотрудник Ренат Зайнуллин пыриськизы. «Туннэ асьмелы юонэз но кысконэз калыке ӧжытгес вӧлмытон сярысь сюлмаськоно. Уго соос арлы быдэ Россиысь 700 сюрслы матэ адямиез улонэн люко. Озьы арысь аре бадӟым лыдпусъёс люкасько. Нош асьмеос, оло, сое шӧдытэк но кылиськом. Юон – кемаласен кылдэм урод сям. Соин туннэ тросэз анай-атайёс нылпизылы тазалыко улон сӥзё, нош куддыр – нылпиос сыӵе мылкыдын уло», - веразы семинарез радъясьёс.

Алигес та выллем пумиськон Уфаын но радъяськиз. Отын республикаысь Бигеръёслэн конгрессылэн исполкомез «Трезвый Башкортостан» огазеяськонлэн кичӧлтонэзлы дурбасьтӥз. Соос курыт юонэн вуз карыны нимысьтыз дыр но инты висъян, интыысь аскивалтэтъёслы та ласянь ужъёсты нуыны паськытгес луонлыкъёс сётон сярысь веразы. Уго туннэ тросаз гуртъёсын улӥсьёс со сярысь куронэн вазисько. Озьыен,курыт юонэн вуз карон котькинэ сюлмаськытэ. Конгрессэн кивалтӥсь Загир Хакимовлэн малпамезъя,гуртъёсын, уж интыос кылдытон сяна, юонэн нюръяськон но валтӥсь ужпумен лыдъяське. Соин урод сямъёсты вормон – быдэс шаерлэн сюлмаськонэз.

Дасяз

Ольга ГИЛЬМУРАНОВА.