Калык пӧртэм сюлмаськонэн улэ

Калтасы ёросысь Бадӟым Качак гурт поселенилэн бюд­жетэз кык миллион манет­лэсь тросгес луэ. Но озьы ке но со вань кулэяськонъёсты ӵоктаны уг тырмы. Кылсярысь, кылем арын гурт калык сель­советэ сюресъёсты тупатыны, котыр улосэз утьыны куронъ­ёсын вазиськылӥз. Соосты быдэстыны гурт поселенилэн бюджетысьтыз одӥг милли­онлэсь ятыр коньдон кошке­мын. Озьыен, одӥг ужпумен герӟаськем вазиськонъёсты быдэстон понна ӝыныез конь­дон быремын. Но со пумысен нокин уз тышкаськы, вылды, сюрес туннэ пыдын ветлӥсьлы но, машинаен ворттылӥсьлы но кулэ. Ульчаосты югдытон ласянь но со выллемгес югдур. Кылем арын тыл вотэсъёсты юнматонлы кык сю сюрс манет тыр коньдон висъямын. Мукет чыры-пыры ужъёсты быдэсъян но трос коньдон поттэмез кулэ карем. Кылем арын Бадӟым Качак гурт поселениын ка­лыклэн одӥгез вазиськонэз но эскериськытэк кыльымтэ. Нош соос пӧлысь быдэстыны луымтэ ужпумъёсты азьланяз эскерыны чакламын.

Татышлы ёросысь коть­куд гуртысь калыкез сюре­сэн герӟаськем ужпумъёс сюлмаськыто, кожалод. Уго гурт поселениосы кылем арын тросэз со пумысен юанъёсын вазиськылӥзы. Калыкез сюрес тужгес тол куазен сюлмаськы­тэ. Уго та вакытэ ульчаосын машинаосын гинэ ӧвӧл, пы­дын пырон понна но куддыр бадӟым шугъяськонъёс пыр потоно. Выль Татышлы гурт поселение кылем арын та ужпумез аспӧртэм быдэстӥз – сюресъёсты лымылэсь тазатонэз Уразгильдыысь ужбергатӥсьлы Флюр Ба­дретдиновлы оскизы. Солэн ужъёссэ ӟеч быдэстэменыз Бальзюгаысь, Майскысь, Ураз­гильдыысь, Выль Татышлысь ульчаос лымы пӧлы ӧз со­гиське. Выль Татышлы сель­советлэн гурт поселениеныз кивалтӥсьлэн Н. В. Рахимья­новлэн верамезъя, калыклэн вазиськонэз арлэн вакытэныз но герӟаськемын. Озьы тросэз тулыс котыр улосэз тазатон сярысь юанэн вазисько, гужем – пудоосты кырын нуллонэн, сӥзьыл – ульчаосты югдыто­нэн. Кылем арын Уразгиль­дыысь ульчаосты югдытонын бадӟым ужъёс нуэмын. Татысь ик шай вылысь юртэз, Цен­тральная ульчаысь сюрес­лэсь одӥг люкетсэ тупатӥзы. Со сяна, ар ӵоже Выль Та­тышлыысь но Бальзюгаысь колодчаос выльдэмын, Выль Татышлыысь но Уразгильды­ысь выжъёс лэсьтэмын. Ар ӵоже огъя ньыль ошмес ту­патэмын. Нош вӧсяськон юрт котырысь кенеръёслэсь кӧня ке люкетсэ тупатыны Баль­зюгаысь ужбергатӥсь Яков Камидуллин юрттӥз. Озьы­ен, татысь гурт поселение ужбергатӥсьёсын но матысь кусып возе. Ӵошен уго котькуд ужез вормыны луоно. Выль Та­тышлы гурт поселение егитъ­ёс, егит семья но ӵемысь вуы­ло. Соос ӝутӥськыны музъем яке нюлэс басьтон сярысь юанъёсын вазиськыло. Тун­нэ нуналэ татын 13 семьяос улон котырзэс тупатыны ку­лэяськисьёсын учётын сыло. Нош кылем арын ожысь ньыль ветеранъёслэн кузпалъёссы­лы улон юрт басьтыны уж­кагазъёс басьтыны юрттӥзы. Субсидиос пумысен вазись­кисьёслэн но лыдзы ӧжыт ӧз луы. Кылем арын, кылсярысь, ватсаса коньдон басьтыны 52 семьяослы ужкагаз дасямын.

Татышлы ёросын Улысь Балтач гурт поселение тужгес узыреныз лыдъяське. Соослэн узырлыксы – 11 гуртъёс. Тол куазен сельсоветэ Альгаысь, Утар-Елгаысь, Бигинейысь тросгес вазиськисьёс луизы. Татысь калыкез сюресъёсты усьтанэн герӟаськем ужпумъ­ёс сюлмаськытӥзы. Улысь Балтач сельсовет гурт посе­лениен кивалтӥсьлэн Эдуард Рахимзяновлэн верамезъя, кылем арын калыкез тужгес шугъяськытӥзы ульчаосты югдытон, музъемез ас вылад гожтон, нюлэс басьтыны ужка­газ дасян. Со сяна, пӧртэм кун программаосы пыриськыны мылкыд карисьёс но ӧжыт ӧз луэ. Соослэн котькудзылэн нырысетӥ вамышсы сельсове­тын лэсьтӥськиз.

Кылем арын та ёросысь ик Калмияр гурт поселение 1634 гожтэтэн вазиськизы. Соос пӧлысь 68-эз улон интыез во­штонэн герӟаськемын луиз, витез – улон котырез тупато­нэн, 16-ез – нюлэс басьтонэн, 1514-ез – пӧртэм выпискаос, справкаос сётонэн. Но калы­клэн сюлмаськонэз соин гинэ ӧз йылпумъяськы. Уж дурысь ӝытазе бертӥсьёс пеймытэсь ульчаослы ӝожтӥськизы. Нош тол куазен сюрес вылэ маши­наен потасьёс урод сюресъёс пумысен сюлмаськонъёссэс кисьтӥзы. Нош Петропавловка­ысь но Савкиязысь калык гурт поселение тросгес ву пумысен ӝожтӥськонъёсыныз вуэ. Уго вулы арлэн котькуд дыраз татын зэмос дефицит кылдэ. Соин кылем арын, кылсярысь, Петропавловкаысь ошмесэз выльдӥзы. Но калыклэн сюл­маськонэз соин ӧз йылпумъ­яськы, ошмес выльысь тупатэ­мез кулэ каре. Со бордын таяз арын но тыршозы.

Туннэ, шӧдӥське, гурт поселениосты одӥг валтӥсь ужпум огазея - тол куазен сю­ресъёсты лымылэсь тазатон. Нош Янаул ёросысь Шудек гурт поселениын, кылсярысь та выллем сюлмаськонъёсты уг тодо. Татысь сюресъёсты тазатон «Победа» ООО-лы оскемын. Соин гурт калыклы буранъёс но кышкыт ӧвӧл – сюрессы котьку усьтэмын. «Победа» ООО гурт поселени­лы гравий сюресъёсты тупато­нын но юрттэт возьматоз на. Нош кылем арын сельсоветэ улон юртъёсты ӝутонэн (про­граммаос пумысен), котыр улосэз утёнэн герӟаськем юанъёсын тросгес вазись­кизы. Со сяна, сельсоветлы семья куспысь валамтэосты но эскероно луиз.

Вуж Варяш гурт поселени­лы кылем арын тужгес «пӧсь» йӧтӥз гуртъёс пушкысь сю­ресъёсты тупатонэн но ульча­осты югдытонэн герӟаськем юанъёсын. Уго татысь гур­тъёсын тросэзлэн асьсэлэн машинаоссы вань. Нош сӥзьыл яке тулыс соосын ульчаостӥ потон секытэн сётӥське. Соин та ласянь ужпумъёсты бы­дэстон таяз аре но выжтэ­мын. Ульчаосты югдытон но азинтӥськоз на.

Калыклэсь вань куронъ­ёссэ быдэстыны уг ке но луы, гурт поселенилэн кивалтэтэз котькуд вазиськисьлы юрт­тэт возьматыны тырше. Уготросэзлэн гурт калыклэн мал­паназ, сельсовет со - ЖКХ но, ДРСУ но, газ-сервис но. Озьы ке но куддыр асьмеос соос­лэсь быдэстэм ужзэс дунъ­яны ум быгатӥське. Ар ӵоже, кылсярысь, сюрес дуръёсы, гурт котыре жуг-жагмес возь­даськытэк куяськом, тупатэм ульчаосы тулыс но сӥзьыл тракторен пыраськом. Нош собере ӝожтӥськонъёсынымы сельсоветэ вазиськыны дыртӥськом.

Ольга НИГАМАТУЛЛИНА.