Оскымон шудон вормонэ вуттэ

Азьвыл аръ­ёсы басьтэм вормонъёс вунӥзы, Татышлы ёросысь спортсменъёс республи­каысь 15 устоосыз пӧлысь ышизы. Соин ёрос Кенешлэн секретарез Р. Г. Рахимов ӝӧквыл теннисэн шудонэз улӟытыны малпаз. Озьы 2011-тӥ арын Выль Татыш­лыын, Радик Галимзяно­вичлэн вордскем гуртаз но ӝӧквыл теннисэн эшъ­яськем дышетскон юртаз, нырысетӥ ӵошатсконъёс радъяськизы. Отчы гурт поселениысь шудӥсьёс пы­риськизы. Нош таяз арысь ӵошатсконэ быдэс ёросысь кужмоосыз спортсменъёс вуизы. Соосты ӟечкыласа Р. Г. Рахимов но ёросысь егитъёслэн политиказыя но спортъя ёзэтэн кивалтӥсь Н. Х. Хуснуллин вераськи­зы. Радик Галимзянович ӵошатсконлэсь тросгес ка­лыкез бордаз кысконэзлы, соосты тазалыко улонэн эшъяськытонэзлы осконзэ вераз. Республикамылэсь куншетсэ ӝутонэз кылем арысь вормисьёслы Елена Нуриахметовалы но Станис­лав Хасаньяновлы оскизы. Нош собере шудӥсьёс тен­нис ӝӧк сьӧры вамыштӥзы.

Та нуналэ ӵошатсконэ 42 пиос вуизы. Соос куать группаослы люкиськыса шудӥзы. Теннис ӝӧк сьӧрын нырысетӥ шудонъёсы ик Выль Татышлы но Улысь Балтач гурт поселенио­сысь пиос ӟеч дасьлыксэс возьматӥзы. Соин, вылды, соос пӧлысь тросэзлэн финалэ шедемзылы нокин ӧз паймы. Учкисьёс понна тужгес «пӧсь» луизы берпуметӥ шу­донъёс. Соослы фина­лын вормисьёс пумы­сен кема тунаськоно луиз. Пиос котькудзы огвыллем шудонэны­зы висъяськизы. Но та нуналэ вормон Улысь Балтач гурт поселе­ниысь Юрий Губаевлы пиштӥз. Нош Станис­лав Хасаньяновлы туэ кыкетӥ интыен гинэ буйгатсконо луиз. Куинетӥ интыез Выль Татышлы гурт поселе­ниысь Альфид Зайно­ков басьтӥз.

Нылкышноос ӵошатсконэ ӧжытгес вуи­зы. Соосты куинь группа­ослы люкизы. Финалэ 15 нылкышноос пӧлысь куатез потӥз. Та нуналэ теннис ӝӧк сьӧрын ассэ зэмос кузёен шӧдӥз Выль Татышлы гурт поселениысь Ифира Гиль­фанова. Со котькуд пумись­конын оскымон шудӥз. Тыр­шемез юнме ӧз луы – Ифира Гильфанова кубок утӥз. Нош кыкетӥ но куинетӥ интыо­сты Кальтяй но Вылысь Та­тышлы гурт поселениосысь Элина Гарипова но Анюта Шамтиева люкизы.

Ӵошатсконъёсты радъ­ясь нылпиослэсь шудонъ­ёссэс тужгес мур тунсыкъ­яськонэн учкиз. Радик Га­лимзянович соос пӧлысь азьланяз ӝӧквыл теннисэз азинтӥсьёсты адӟиз кадь. Ӵошатсконэ 20 дышетски­сьёс пыриськыны мылкыд каризы. Зэм, со Выль Та­тышлы школаысь пиналъёс понна гинэ радъяськиз. Вормисьёсты кык группа­осъя данъязы. Нырысетӥяз вормисе потӥз Вячеслав Даваев. Кыкетӥ но куинетӥ интыосты Идель Шакиров но Рональдино Гарифуллин (1-6-тӥ классъёс пӧлын) басьтӥзы. Нош 7-11-тӥ клас­съёс пӧлын кужмогес луиз Ильнар Латипов. Солэсь ӧжытлы бере кылизы Эду­ард Рахимов но Вячеслав Муллаяров.

Та нуналэ тужгес мӧйы но пинал шудӥсьёс пусъ­емын. Арлыдоос пӧлын та ласянь висъяськизы Вы­лысь Татышлыысь Фар­дуна Фатхлисламова но Бадряш гурт поселениысь Финат Гарипов. Нош тужгес пиналэныз шудӥсен Влас Миннимухаметов лыдъ­ямын. Ӵошатсконын вор­мисьёс Данъян грамотао­сын, медальёсын но дуно кузьымъёсын данъямын. Нош пумиськонэз радъяны юрттӥсьёслы Р. Г. Рахимов сюлмысь тау карон кылъ­ёссэ вера.

Ольга НИГАМАТУЛЛИНА.

Татышлы ёрос.