Гужем куазь ӟырдыт ужамез кулэ каре

Калтасы ёросысь Ленин нимо СХПК-ын та дыре турын дасян ужъ­ёс ӟырдыт мыно. Пӧсьтолэзьлэн нырысетӥ нуналъёсаз пилем сьӧрысь потэм шунды тылсиос кемалы меда? Али дыре гурт хозяйствоосын ужа­сьёсты та юан пӧртэм ласянь сю­лэмшугъяськытэ. Бадӟым Туганеево гуртэ вуылыса, ми татысь хозяйство­лэн кивалтӥсеныз Дамир Викторович Мухаметшинэн пумиськимы. Вуон дырмы ӵапак нуназеян вакытэ тупаз бере бусыын ужасьёс но амбар вӧзын сылӥсь сиськон юрт вӧзы лыктэмын вал. Та дыре Юрий Николаев, Юрий Вайтиев, Геннадий Вачиев бусыын сенаж дасяло.

- Гурт хозяйствоын ужаны туала вакытэ туж секыт. Ужась киос уг тыр­мо, куазь но маке весь зорыса улӥз. Со шоры учкытэк, толэз потыны одно ик тырмыт пудо сиён дасяно. Кылем арлэн 500 т турынэз кылемын на. Нош туннэ нуналэ 100 т турын дасямы ни. Толэз потыны ваньзэ 3000 т турын кулэ луоз. Сенаж дасяськомы, куазь гинэ мед тупалоз, ужмес азьланьтыны зоръёс медаз люкетэ вал. Хозяйство­ямы ваньмыз 430 йыр сюро пудо лыдъ­яське. Ёросысьтымы хозяйствоос пӧлын ми со ласянь куинетӥ интыын луиськом. Шуг-секытъёс трос пумись­ко.Но туннэ котькытын со выллем югдур кылдэмын. Озьы ке но ужано, ужаськомы, азьланяз но ужаломы на, – вера Дамир Викторович.

Ужасьёс азьланяз бусыосты то­лйись культураос улэ дасян борды кутскозы. Нош собере ю тысь октон дыр вуоз. Ленин нимо СХПК-ын ужа­сьёс тодо: гужем пӧсям вудэ кисьтӥд ке, толалтэ амбаръёсын тӧл уз шула. Соин пудо сиён дасясьёс вань кужым­зэс сёто дыраз тырмыт сиён дасянлы, ужъёссэс ӝегатскытэк лэсьтон ся­рысь сюлмасько.

Ирина САМИГУЛОВА.

Калтасы ёрос.