Гужем ужъёсты дыраз быдэстоно

Янаул ёросысь «Агро М» хозяйствоын ми вуылон ну­налэ ужъёс ӟырдыт мыно вал. Бусыосысь турын октыса бадӟымесь рулонъёсы бине­мын. Соосты машинаосы ты­рыса нулло. «Та нуналъёсы 920 гектарысь турын турна­мын, 605 тонна турын, 3250 тонна сенаж, 900 тонна силос дасямын. Татын њеч тыршо Ирик Шартдинов, Ульфат Му­син, Ильшат Кашапов, Радик Султанов, Фаниль Габдул­хаков», - вера хозяйствоысь бригадир Павел Минлебаев.

«Победа» ООО-лы туэ огъя 830 йыр сюро пудолы пайдаё сиён дасяно. Уго хозяйствоязы 183 йыр ӟеч выжысь кысконо скалъёссы лыдъясько. Ӟеч сиёнтэк соос но трос йӧлэн уз шум­поттэ. Победаос та нуналъ­ёсы сенаж но турын дасян бордын тыршо. Татысь сенаж гуосы ньыль сюрс тонналэсь трос пудо сиён тыремын ни. Нош турынзэс победаос ру­лонэ бинё. Со 200 тонналэсь ятыр дасямын.

Татышлы ёросысь «Агро-Танып» СПК-ын ужасьёс но гужем кысык нуналъёслэсь дунзэс валаса ужало. Турын дасян ужъёс борды алигес, куазь шулдыр кариськем бере гинэ кутскизы ке но, трос лэсьтыны вутскизы ни. Та нуналъёсы турынлэн 70 процентэз турнамын но 25 процентэз дасямын. Со сяна, сенажлэн 137 процентэз ты­ремын. Вож турынэз Анатолий Шарафутдинов, Геннадий Бай­рамшин, Григорий Садыков вортто. Турнан агрегатъёсын Ринат Хайдаршин, Артём Муратшин, Алексей Костин турнало. Прицепной ком­байнэн Салават Ялаев ужа. Пудо сиён дасянын Рифат Басимов, Вадим Камидуллин, Григорий Зиятов, Арсений Байдиев, Сахип Гарайшин но ӟеч тыршо. Горючий тырмыт, ужзылы коньдон дыраз висъ­яське, ужась калыклы руло­нэн турын сётэмын. Озьыен, таныпъёслэн ужъёссэс дыраз но ӟеч быдэстыны быгатон­зылы осконзы бадӟым.

«Дэмен» СПК-ын нырысетӥ погыртэм турынзэс октыны куазь ӧз сёты ке но, татысь ужасьёс зоръёс дуг­дэм бере ик уж борды ӟырдыт кутскизы. Гужем пудо сиён дасян ужъёсын трос сюлэм­шугъяськонъёс ке но кылдо, хозяйстволэн ужъёсыз инты­яз уг сыло. Та нуналъёсы 312 гектарысь турын турнамын, 1726 тонна сенаж тыремын, 322 тонна турын дасямын. Гуосы люцерналэсь, козлят­никлэсь сенаж тыремын. Со сяна, дэменъёслэн кылем арын дасям пудо сиёнзы­лэн 1500 тоннаез мултэсэн кылемын на. Бусы ужъёсын Яков Шарипов, Фёдор Абдул­лин, Ульфат Шамтиев тыршо. Пудо сиён дасян ужъёсын артэ хозяйствоын фермаосты, амбаръёсты тупатъян ужъёс нуисько.

«Рассвет» АОАО-ын ужа­сьёс но вазь ӵукна ик турын дасян бусыосы дырто. Таяз гужем зор шапыкъёс тырмыт усизы бере, турынлэн удал­тэмез ужасьёсты шумпоттэ. Та дырозь ваньзэ 2500 тонна сенаж тыремын, 350 тонна турын дасямын. Хозяйствоын ужасьёс но кивалтэт таиз толлы 4000 тонна пудо сиён дасяны план пуктӥзы. Та ну­налъёсы бусыын тыршисьёс пӧлын Герман Рафиков, Сер­гей Хайдаров, Иван Рафиков луо. Соос МТЗ-80 тракторен ужало, турынэз прессовать каро. Соосын артэ Марат Гильмияров, Евгений Дав­летшин, Вениамин Шайдуллин ужало. Турынэз Олег Зари­пов, Славик Валинуров, Ефим Галиаскаров турнало. Вож турынэз трамбовать каронын Владислав Рахимов, Радиф Агъяфаров, Аркадий Гузаиров тыршо.

Калтасы ёросысь «Новый путь» СХПК-ын ужасьёслэн но та нуналъёсы турын дасян бадӟым но валтӥсь ужпумзы луэ. Хозяйстволэн бусыосаз Андрей Насипуллин сюлмысь тырше. Со турын турнаны но, прессовать карыны но вутске. Бусыысь турынэз Сергей Ши­фаратдинов КамАЗ-эн нуллэ. Соин артэ Андрей Султанов сюлмысь тырше. Со Т-150 трактореныз рулонэ бинем турынэз ворттэ. Та нуналъёсы хозяйстволэн бусыосысьтыз 150 т турын дасямын, 800 т сенаж тыремын. Азьланяз си­лос гуосты тырмытон борды кутскозы. Хозяйство ужасьёс азьын но пунэме уз кыльы, ӟеч тыршисьёс рулонэн ту­рын басьтозы. Ужасьёслэн горючий ласянь но секыт­лыкъёссы уг кылдо. Ужзы азьланьтӥське бере, ас азязы пуктэм ужпумъёссэс дыраз быдэстыны осконзы вань.

(Лыдпусъёс 15-тӥ пӧсь-толэзе басьтэмын).

Дасяз

Ирина САМИГУЛОВА.