Та таланто адямиен мон Выль Татышлы гуртэ ужаны но улыны вуыса тодматски. Татысь школаын ужаны кутскем бере, культура юртэ пиналъёсын репетиция ортчытыны потӥмы. Сцена вылэ ӝутскимы гинэ, одӥгез пияш шуэ:
- Дасям номермес Зифина апайлы возьматомы.
- Кин меда со Зифина апай? – малпасько ас поннам. Тани залэ жингрес куараен серекъяса, капчи мылкыдо кышномурт пыриз. Пиналъёс сцена вылэ тубыса, дасям номерзэс возьматыны кутскизы. Зифина Ильдусовна сцена вӧзы султыса учке. Дырын-дырын со пиналъёс доры кариське, собере зал трос вера:
- Эн востэмъяське, ымдэс усьялэ, куарадэс жалятэк кыре поттэ, сцена вылын тӥ, пиналъёс, сцена вылын!
Репетициысь ми кык час ортчыса гинэ кошкимы. Зифина Ильдусовна дасям номермес «сӥсъяса» учкем бере, номермы эшшо но чебергес луиз. Культура юртысь потыку, выль тодмое шорам учкыса пальпотӥз:
- Вождэс эн вае, мон валасько, кема курадӟытӥ, дыр, тӥледыз. Сямы сыӵе – мынам ньӧмыз понна гинэ ужаме уг поты. Лэсьтэм уж адӟиськымон мед луоз, иське, со борды басьтӥськонэз ӧвӧл.
Та нырысетӥ пумиськонмы монэ чик ӧз кышкаты. Ас азяз но мукетъёс азе вылӥ куронъёс пуктыны быгатӥсь адями бордаз арысь аре юнгес кыскиз. Солэн вокалъя, хореографияя, режиссурая, крезьгуръя тодон-валанэз туж узыр. Выль эшелэн ужамез шоры учкыса, мон ӵемысь малпалляй:
- Та адями сцена вылын ужаны вордӥськемын. Нош одӥг пол тодӥ: со кема аръёс ӵоже медицина удысын ужам. Ужан удысъёсыз сярысь со вера:
- Медицина но, сцена но сюлмысь ужаны быгатэмез кулэ каро. Кыказ ик удысъёсын тон адями понна ужаськод. Одӥгаз но пӧяськоно, астэ жаляно ӧвӧл.
Зэмзэ верано ке, кӧня тодӥсько та адямиез, сомында мон солы паймисько. Ма кызьы, пе, уд паймы. Шуом, пукиськомы залын концерт учкыса. Тодмо кырӟась, шулдыр кырӟан, калык кизэ чабе. Тазьы учкыку, нокыӵе тырмымтэез уг адӟиськы кадь. Нош эше киоссэ ик посыса сюлмысь вера:
- Эх, ӧзгес пӧрмыты, кырӟанзэ кылзӥсьлэн сюлэмаз ӧз вутты. Куараез но ӧзгес тырмы, «фальшивить» кариз. Тональностьсэ пумаз ыштӥз.
Ас ужзэ ӟеч тодӥсь адями ноку луэменыз уг тыры, ялан выльзэ, тунсыкозэ утча. Ас удысаз тодон-валан басьтон борды кыстӥськемез ик сое 2001-тӥ арын Стерлитамакысь культурая техникуме вуттэ. Дышетскон юртэз со горд дипломен йылпумъя, театральной представлениосты дасясь луэ.
Фархутдиновъёслэн семьязы Выль Татышлые улыны 1994-тӥ арын вуэм. Свердловск улосвылысь Нижняя Салда городысь бертыса, Зифина Ильдусовна культура удысын ужаны кутскем. Выль ужаз со йырыныз «выем». Жингрес куараё кырӟасьлэн «Уральские самоцветы» калык ансамбле ветлыса люкам опытэз выль ужаз туж юртто. Та аръёсы солы уж дураз тужгес пӧсь йӧтэ. Башкортостанысь удмуртъёслэн сокугес кылдэм НКЦ-зы пӧртэм бадӟымесь ужрадъёс ортчытъяны кутске. Со аръёсты тодаз вайыса Зифина Ильдусовна вера:
- Соку доре бертылыны ик дыр ӧй вал. Быдэс нунал ужын, ӝыт концертъёс, калык понна пӧртэм ужрадъёс ортчытӥськомы, уйёсы егитъёслы дискотекаос лэсьтоно на. Асьмеос но концертъёсын, спектакльёсын потаськомы, ми доры но вуыло. Ёросын, республикаын, регионъёс куспын ортчылӥсь ужрадъёс ми дорын луо. Ваньмаз вутсконо, ужрадъёсты ӟеч ортчытоно. Семья, дор, нылпиос палэнэ кылё. Но мон номыр сярысь уг жаляськы, ужасько, кызьы сюлмы косэ. Мукет сямен уг быгатӥськы.
- Дугды ай, пӧяськисько,- эшелэн тусыз малпаськись луэ, синъёсыз синкылиен тырмо. - Жалясько тани ма сярысь. Куинь ар талэсь азьвыл концертэн Уфае мыныны кулэ вал. Ансамблез дасянэ но пыриськи, чебер постановка лэсьтыны юрттӥ, нош коллективе егитъёсты гинэ басьтӥзы. Уфаын дышетскись пие соку монэ туж возьмам, автобус доры олокӧня пол лыктылэм. Со нуналъёсы мон Русланме пыраклы ыштӥ…
Культура удысын кызь арлэсь кема ужа бере ини, трос дыръя вераськонмы но культура удыслы сӥземын луэ. Ӵем дыръя эше пӧртэм сюлэмшугъяськонъёссэ шара вера:
- Туала егитъёс пӧлын котькыџеез вань. Одӥгез гинэ паймытэ: малы соос культура юртлэсь палэнско? Ӵем дыръя сюрессы кафеосы нуэ, ӝытъёссы отын ортчылэ.
Культура удысын ужасьёслэн аспӧртэм дуннезы, бугыръяськись мылкыдзы. Та удысын ужан понна трос чидан, ог-огдэ валаны быгатон, улон шоры творческой синъёсын учкыны быгатэм кулэ. Соин, дыр, та удысын ужаны ваньмыз уг чидало. Тросэз таланто арганчиос, кырӟасьёс палэнэ кошко, мукет удысъёсты быръё. Солы трос валэктонъёс шедьтыны луэ. Кинлэн ке семьяяз валантэмъёс кылдо, кин ке коньдон ласянь шугъяське. Зифина Ильдусовналэн коллективаз но пӧртэм адямиос ужазы. Нош кивалтӥсь понна котьку нырысетӥ интыын ӧнерчилэн быгатэмез луэ.
- Ас ужзэс быгатыса лэсьтӥсь, кужмо ӧнерчиос понна мон тылэ но, вуэ но пырыны дась, нокинэ но вӧсь карыны уг лэзьы. Нош юнме супыльтӥсьёсын, ужзэс мыл потытэк лэсьтӥсьёсын, юонэн эшъяськисьёсын мон котьку нюръясько, – вера кивалтӥсь.
Зифина Ильдусовнаез ёросын но, палэнын но тросэз жингрес кырӟам куараеныз, сцена вылын пӧртэм рольёсты шудыны быгатэменыз, визьмо кенешчи луэменыз тодо. Пӧртэм ласянь таланто адямиез, чурыт куронъёс пуктыны быгатӥсь кивалтӥсез котькытын гажало, ярато но синмаськыса шуо:
- Ужез понна ӝуась адями! Вылӥ профессионал!
Ирина САМИГУЛОВА.
Татышлы ёрос.
Оставить сообщение: