Первенствоез усьтыса Татышлы ёрос администрациен кивалтӥсь Рушан Гараев вераськиз. - Республикаын спортэз азинтонлы бадӟым саклык висъяське, - вераз со. – Татышлы ёросын но со ласянь ужъёс ӟеч азинско. Ми республикаысь, Россиысь но дуннеысь чемпионъёсынымы данъяськиськомы. Нош туннэ ӵошатсконъёсы пыриськисьёслы вормонъёс сӥзиськом. Россиысь Кускерттонэн нюръяськонъя федерацилэн Президентэз Хабир Хабибуллин но ӵошатсконъёслэн кулэлыксы сярысь вераз. Со ёрос администрациен кивалтӥсез Р. К. Гараевез но ёросысь егитъёслэн политиказыя но спортъя ёзэтэн кивалтӥсез Н. Х. Хуснуллинэз тау карон гожтэтъёсын пусйиз. Та нуналэ спортсменъёсты ӟечкыланы Россилэн пӧртэм сэрегъёсысьтыз куноос вуизы. Соос кузёослы но трос шуныт кылъёсын вазиськизы. Куноослэн кылъёссыя шӧдӥськиз, спортсменъёс ӵошатсконъёсы вормон понна вуэмын.
Нырысетӥяз пумиськонын ик со яркыт шӧдӥськиз. Озьы ке но куноос республикаысьтымы спортсменъёслэсь нюръяськемзэс витизы. Тани ковёре Вылысь Татышлыысь Руслан Зарифьянов потӥз. Со егит ке но, Россилэн огазеям командаез понна но нюръяське ни. Та нуналэ финалын со Карачаево-Черкесиысь спортсменэн пумиськиз. Но ковёрын кыдёкысь кунолы удалтӥз. Руслан Зарифьянов – кыкетӥ интыын.
Кускерттонэн нюръясь конын Башкортостанысь спортсменъёс укмыс медаль басьтӥзы , Ю. Баширова но А. Алиева асьсэлэн категориосазы чемпион нимъёсты утӥзы. Медальёслэн лыдзыя, Вылысь Татышлыын азьпалан луизы Татарстанысь спортсменъёс. Соос 13 медаль утӥзы. Со сяна, вормисьёс пӧлын луизы Северной Осетиысь-Аланиысь спортсменъёс (8 медаль), Карачаево-Черкесиысь (6), Москваысь (4), Волгоградысь, Пермьысь, Челябинскысь (3), Липецкысь (2). Нош Ингушетиысь, Крымысь, Рязаньысь, Тамбовысь, Хакасиысь, Чечняысь быдэн одӥг нюръяськисьсы вормонэн шумпоттӥз. - Россиысь Кускерттонэн нюръяськонъя федерацилэн нимыныз татышлыослы, ёрос администрациен кивалтӥсьлы Рушан Кадимович Гараевлы, спонсоръёслы шуныт пумитамзы понна тау карон кылъёсме верасько, - шуиз ӵошатсконъёсты йылпумъяса Россиысь кускерттонэн нюръяськонъя огазеям командалэн валтӥсь тренерез Адип Валемеев. Россилэн кускерттонэн нюръяськонъя первенствоез йылпумъяськиз. Табере шаермылэн огазеям командаез кылдытэмын луоз. Отын Башкортостанысь нюръяськисьёс но асьлэсь интызэс шедьтозы.
Дасяз Ольга НИГАМАТУЛЛИНА.
Оставить сообщение: