icon_gotop
18+
autorisation
Войти | Регистрация
Время в Татышле
10:20
Пятница, 29 Марта
Рекламный баннер 990x90px top

Вормон тыршытэк уг вуы

16:24 21.05.2015

Туэ фестиваль нырысьсэ янаул музъемын радъясь­киз. Удмурт школаосысь – Балтач ёросысь Асавкаысь, Бурай ёросысь Ваныш-Алпа­утовоысь, Калтасы ёросысь Бадӟым Качакысь, Татышлы ёросысь Выль Татышлыысь, Улысь Балтачысь но Ураз­гильдыысь, Янаул ёросысь Вуж Варяшысь, Сандугачысь, Шудекысь но Ямадыысь - дас командаосты Вуж Варяш гурт пумитаз. Фестиваль сабантуй кырын радъяськиз. Ужрадэ варяшъёс пыр-поч дасяськил­лям: культура юртын ужасьёс сцена дасяллям, школаын дышетскисьёс спортлы сӥзем эктон-кырӟанъёс возьматӥзы, дышетӥсьёс быдэс нунал ӵоже куноослы, пиналъёс­лы пӧсь сиён, чай дасян ся­рысь сюлмаськизы. Фести­валез ортчытыны коньдонэн юрттӥзы «Колхоз «Восток» СПК, Вуж Варяш гурт поселе­нилэн администрациез.

Пиналъёсты ӟечкыласа, ужрадэз усьтыса вераськи­зы Вуж Варяш гурт поселе­нилэн администрациеныз кивалтӥсь М. Ш. Шаритди­нов, БР-ысь удмуртъёслэн НКЦ-енызы кивалтӥсьлэн Янаул ёросъя воштӥсез Ю. С. Саитов, БР-ысь удмуртъёс­лэн ИКЦ-енызы кивалтӥсь Л. З. Рахимьянова, Янаул ёросысь дышетонъя управ­лениен кивалтӥсь А. А. Ша­рафисламов. Ваньзы соос спортсменъёслы тазалык, азинсконъёс но вормонъёс сӥзизы. Фестивальлэсь флаг­зэ ӝутонэз оскизы азьвыл аръёсы спортъя фестивальё­сын бадӟымесь вормонъёс утэмъёслы - кужмоос пӧлысь кужмоослы: Бадӟым Качак школаысь Оксана Казиак­баровалы но Выль Татышлы школаысь Кирилл Шайсла­мовлы.

Ӵошатсконъёс кутскизы. Пиналъёсты данъяса выл­лем, пилемъёс сьӧртӥшунды но мыняса учкиз. Нылъёс но пиос 60, 500, 1000 ме­тре бызьылонын, кузьдалае тэтчанын, тупез лэзьянын, эстафетаын но волейболын усто быгатонлыкъёссэс возьматӥзы.

Судейской командаын ужазы пенсиысь дышетӥсь В. Г. Галиманов (Вуж Варяш гурт) но физкультурая дышетӥсьёс В. Ф. Мухаметшин но А. С. Зайдуллин (Шудек школа), С. М. Мингазиев (Максим школа), Л. С. Багаут­динов (Вуж Варяш школа), П. К. Нурисламов (Ямады школа), А. П. Минлибаев (Сандугач шко­ла), В. А. Хабибуллин (Орловка школа). Соослэн ужзы БР-ысь удмуртъёслэн НКЦ-зылэн тау карон гожтэтъёсынызы пусъ­емын.

Фестиваль ӝытозь кыстӥськиз. Ужрадын, огъя вормонъёсты лыдэ басьты­са, котькинлэсь кужмо луиз Бадӟым Качак школалэн ко­мандаез (кивалтӥсез Г. Ю. Ти­мирбаев). Вераны кулэ, бадӟым качакъёс та фестивальын ку­инь ар ӵоже нырысетӥинтыын луизы. Соин ик Спортъя фе­стивальлэн киысь кие выжись кубокез пыраклы соос кие кы­лиз. Кыкетӥ интыын луиз Выль Татышлы школалэн команда­ез (кивалтӥсьсы А. И. Сабан­чин), куинетӥинтыын – Улысь Балтач школалэн командаез (кивалтӥсез Р. В. Губаев). Вормонъёс, грамотаос но меда­льёс сяна, ужрад нылпиосты пумиськытӥз, эшъяськытӥз, яркытэсь малпанъёс кельтӥз.

Владимир ГАЛИМАНОВ, валтӥсь судья: «Вуж варяшъёс – спортэз гажась калык. Та фестивалез ортчытыны малпанмы кемалась вань вал. Туэ малпанмы быдэсмиз! Бадӟым тау ужрадэз ортчыты юрттӥсьёслы. Таӵе ужрадъ­ёс азьпалан но мед луозы, пиналъёслэн эшъяськон ку­сыпъёссы арысь аре мед юн­малоз. Дышетскисьёслы но, дышетћсьёслы но ӟеч сюрес, выль вормонъёс, азинсконъёс сӥзисько. Фестиваль кемалы тодэ кыльымон луиз».

Анастасия ГИНДУЛЛИНА, Бадӟым Качак школаын ды­шетскись: «Спортъя фестивале нырысьсэ пыриськи. Спортлэн куинь видъёсызъя витьымтэ шорысь нырысетӥинтыын луи. Мон туннэ туж шудо! Азьпалан та выллем ужрадъёсы пыриськыны мылкыды эшшо но будӥз».

Чошатсконын вормисьёс:

1000 метре бызьылон

I инты – Валерий Байметов (Бадӟым Качак школа)

II инты – Янис Сахипов (Улысь Балтач школа)

III инты – Влас Кайранов (Улысь Балтач школа)

 

500 метре бызьылон

I инты – Виктория Даваева (Выль Татышлы школа)

II инты – Ильвина Шайдуллина (Шудек школа)

III инты –Виктория Зарипова (Улысь Балтач школа)

 

60 метре бызьылон

Пиос:

I инты – Валерий Байметов (Бадӟым Качак школа)

II инты – Владимир Валинуров (Улысь Балтач школа)

III инты – Кирилл Шайсламов (Выль Татышлы школа)

Нылъёс:

I инты – Анастасия Гиндуллина (Бадӟым Качак школа)

II инты – Яна Садретдинова (Выль Татышлы школа )

III инты – Валерия Давлетбаева (Бадӟым качак школа)

 

Тупез кузьдалае лэзьян

Пиос:

I инты – Ильнар Латипов (Выль Татышлы школа)

II инты – Родион Сайфидияров (Асавка школа)

III инты – Виталий Галлямшин (Бадӟым Качак школа)

Нылъёс:

I инты – Виктория Давлетбаева (Бадӟым Качак школа)

II инты – Лилия Абдуллина (Выль Татышлы школа)

III инты – Виктория Туктакеева (Улысь Балтач школа)

 

Эстафета:

I инты – Бадӟым Качак школалэн командаез

II инты – Улысь Балтач школалэн командаез

III инты – Выль Татышлы школалэн командаез

 

Кузьдалае тэтчан

Пиос:

I инты – Янис Сахипов (Улысь Балтач школа)

II инты – Сергей Тимиршин (Бадӟым Качак школа)

III инты – Кирилл Шайсламов (Выль Татышлы школа)

Нылъёс:

I инты – Анастасия Гиндуллина (Бадӟым Качак школа)

II инты – Наталья Аллаярова (Выль Татышлы школа)

II инты – Яна Садретдинова (Выль Татышлы школа)

III инты – Яна Шайсламова (Улысь Балтач школа)

Волейбол

Пиос:

I инты – Бадӟым Качак школалэн командаез

II инты – Улысь Балтач школалэн командаез

III инты – Выль Татышлы школалэн командаез

Нылъёс:

I инты – Бурай ёросысь команда

II инты – Улысь Балтач школалэн командаез

III инты – Бадӟым Качак школалэн командаез

Общекомандной интыос

I инты – Бадӟым Качак школалэн командаез

II инты – Выль Татышлы школалэн командаез

III инты - Улысь Балтач школалэн командаез

Миляуша БУЛАТОВА.

Янаул ёрос.

8300

Оставить сообщение: