Туннэ Башкортостанын 580 сюрс гектарысь пудо сиён турынъёс турнамын. Та нуналъёсы, БР-ысь Гурт хозяйствоя министерстволэн лыдпусъёсызъя, турын дасян планлэн 87 процентэз быдэстэмын (666 сюрс тонна), сенажлэн – 64 процентэз (1,3 млн тонна). Гурт хозяйствоя министерствоын верало: «Туэ пудо сиён одӥг ар но ӝынылы дасяны чакламын. Республикаямы арлы быдэ ужъёсмы таӵе амалэн быдэстӥсько. Вуоно арын куазен ӧз удалты ке, али дасям пудо сиён вылэ пыкъяськыны луоз. Умой ке утялтӥськизы, соос ӟечлыксэс уг ышто».
Пудо сиён дасянэн герӟаськем сюлмаськонъёс гурт калыклы ю-нянь октон сярысь но малпаськыны уг люкето. Та нуналъёсы, кылсярысь, БР-ысь Гурт хозяйствоя министерствоын со пумысен паськыт вераськон радъяськиз. Отчы БР-ысь Правительстволэн Премьер-министрезлэн воштӥсез Ильдар Тимергалин, гурт хозяйствоя министр Николай Коваленко но мукетъёс пыриськизы. «Таяз арын асьмелы 1770 сюрс гектарысь тысё но тысё-кӧжыё культураосты басьтоно, огъя куинь миллион тонналы матэ ю тысь октоно, - вераз Ильдар Тимергалин. – Шаермылэн куд-ог регионъёсаз туэ куазь кӧс луиз. Соин ю тысез бадӟым дунэн вузаны луонлыкъёс кылдозы. Озьыен, асьмелы ю тысьлэсь одӥг килограммзэ но ыштоно ӧвӧл. Со понна гурт предприятиосын, республикаысь МТС-ёсын ю тысь октон комбайнъёсты тупатонэн герӟаськем ужъёсты дыраз йылпумъяно. Со сяна, МТС-ёслы уж радлыксэс ӟеч тодоно, ю-нянь октоно бусыосты утчаса республикамылэн одӥг сэрегысеныз мукетаз «ворттылоно» медаз луы».
Кенешонын ю-нянь октонлы ГСМ дасян, толйись культураосты кизён сярысь но вераськизы. Та удысысь ӧнерчиослэн кылъёссыя, гуртын ваньмыз огазе биниськемын. Соин скал кысконэз, пудо сиён дасянэз но ю-нянь октонэз ог-огзылэсь уд люкы.
Дасямын БР-ысь Гурт хозяйствоя министерстволэн сайтэзъя.
Оставить сообщение: