Туэ ужрадэ Калтасы ёросысь Бадӟым Качак, Татышлы ёросысь Вязовка, Выль Татышлы, Улысь Балтач, Янаул ёросысь Максим, Вуж Варяш, Пермь шаерысь Куеда ёросысь Бадӟым Гондыр, Кирга но Кипчак школаосысь командаос пыриськизы. Тренеръёслэн кылъёссыя, ужрадэ вуон понна транспорт ласянь шуг-секытъёс ке но кылдӥллям, туэ ӵошатсконэ дас ньыль командаос вуизы: азьло аръёсы таӵеез луымтэ на вылэм. Кылсярысь, киргаосты ӵошатсконэ анай-атайёссы ваиллям. Куеда ёросысь удмурт огазеяськонэн кивалтӥсь Станислав Гадиятов шуиз: «Куинь машинаен лыктӥмы».
Пиналъёслы вазиськыса тренер Александр Сабанчин шуиз:
- «Ошмес» газетлэн кубокезлы волейболъя ӵошатсконъёс радъяськемен, Выль Татышлы школаысь пиослэн командазы республикаын вормисьёс пӧлын луиз. Та ужрад ӧз ке луы, милям уровеньмы усёз, малы ке шуоно та ӵошатсконэ ми туж тыршыса дасяськиськом.
- Та ужрад ик Бадӟым Качакысь Дмитрий Тимиршинлы республикаын волейболъя чемпион нимлы кузё луыны юрттӥз, - ватсаз Бадӟым Качак школаысь физкультурая дышетӥсь Григорий Тимирбаев.
Озьы ик пиналъёслы ӟечкылан кылъёсынызы вазиськизы БР-ысь удмуртъёслэн НКЦ-енызы кивалтӥсь, «Ошмес» газетлэн валтӥсь редакторез Салимьян Гарифуллин, Татышлы ёрос кенешлэн секретарез Радик Рахимов, Выль Татышлы школаен кивалтӥсь Рудольф Гафуров.
Командаос трос луэмен (пиослэн - 8, нылъёслэн – 6), пиос Уразгильды но Улысь Балтач школаосын шудӥзы, нылъёс – Выль Татышлы школаын. Котькуд шудон аспӧртэм, тунсыко ортчиз. Нокинлэн но сётӥськемез уг поты, командаос пӧлын ӟырдын нюръяськон пуромиз. Пиналъёс ужрадэ вормон понна вуиллям. Шудон возьматӥз: нылъёс пӧлын тужгес кужмо луиз Бадӟым Гондырысь команда, кыкетӥ интыын – бадӟым качакъёс, куинетӥ – киргаос.
Пиос пӧлын вормисе потӥзы выль татышлыос. Соослэсь ӧжытлы, шуом, ӝыны вамышлы гинэ кылизы Бадӟым Качак школаысь пиос. Куинетӥ интыын – максимъёс. Вераны кулэ, Максим школаысь команда та ужрадэ кыкетӥ ползэ гинэ пыриськиз: пиос усто быгатонлыкъёссэс возьматӥзы. Устоослэсь но усто шудӥсьёсты нимысьтыз данъян грамотаосын пусйизы. «Лучший нападающий» нимлы кузё луизы Кирга школаысь Стелла Мелляхматова но Выль Татышлы школаысь Кирилл Шайсламов, «Лучший защитник» нимлы – бадӟым качакъёс - Светлана Галиахметова но Дмитрий Тимиршин. «Лучший связующий» ним сётэмын Бадӟым Гондыр школаысь Татьяна Газизовалы но Максим школаысь Линар Мухаматнуровлы. Нырысетӥ, кыкетӥ, куинетӥ инты утэм командаосысь пиналъёсты медальёсын данъязы.
Ӵошатсконын котькуд команда ассэ устоен возьматӥз. Пусъёно, пиналъёслэн вормонъёссылэн бадӟым люкетэз – со тренеръёслэн жадёнэз валатэк тыршемзы. Нимаса нокинэ уг вераськы, котькуд тренер та нуналэ командаез понна «ӝуаз». Тренер ке ӧз луы, команда но ас кожаз уз кылды, уз улы.
Миляуша БУЛАТОВА.
Оставить сообщение: